rahzan rahon mein apne jal phailate rahe

rāhzan rāhoñ meñ apne jaal phailāte rahe

ham magar apnī hī dhun meñ jhūmte gaate rahe

duur jitnī duur tak thiiñ raat kī tārīkiyāñ

duur utnī duur ham rāhoñ ko chamkāte rahe

munhasir hai apne apne azm par manzil-rasī

qāfile yuuñ to bahut aate rahe jaate rahe

har tasallī dushman-e-ārām-e-jāñ bantī ga.ī

aap ke ḳhat aur dil ke zaḳhm gahrāte rahe

jaane kis ke naqsh-e-pā the aane vaale qāfile

har qadam par ḳhūn-e-dil ke phuul barsāte rahe

baḌh ga.e kuchh aur 'shāġhil' jānib-e-zindāñ jo ham

taqviyat kuchh aur dil ke hausle paate rahe

rahzan rahon mein apne jal phailate rahe

hum magar apni hi dhun mein jhumte gate rahe

dur jitni dur tak thin raat ki tarikiyan

dur utni dur hum rahon ko chamkate rahe

munhasir hai apne apne azm par manzil-rasi

qafile yun to bahut aate rahe jate rahe

har tasalli dushman-e-aram-e-jaan banti gai

aap ke KHat aur dil ke zaKHm gahraate rahe

jaane kis ke naqsh-e-pa the aane wale qafile

har qadam par KHun-e-dil ke phul barsate rahe

baDh gae kuchh aur 'shaghil' jaanib-e-zindan jo hum

taqwiyat kuchh aur dil ke hausle pate rahe