ras aai hai mujhe gardish-e-ayyam bahut

raas aa.ī hai mujhe gardish-e-ayyām bahut

umr bhar dil ne piye dard-bhare jaam bahut

aaj phir ḳhud se sar-e-rāh mulāqāt huī

be-sabab ḳhud ko kiyā aaj bhī badnām bahut

rang detī hai shafaq zaḳhm-e-judā.ī ko mire

yaad aatā hai koī mujh ko sar-e-shām bahut

chand qatre jo mirī chashm-e-tamannā se gire

der se aa.e magar aa.e mire kaam bahut

raat bhar hijr kī tasvīr-kashī karte rahe

raat bhar vasl se miltā rahā in.aam bahut

maiñ ne us dīda-e-pur-nam ko ka.ī baar paḌhā

ashk-ālūd nigāhoñ meñ the paiġhām bahut

shiddat-e-dard kā ehsās baḌhāne ke liye

aaj aayā hai mire lab pe tirā naam bahut

kis liye duniyā faqat merī tamāshā.ī rahī

ishq meñ log huā karte haiñ nākām bahut

ishq kī ek ḳhatā tujh se bhulā.ī na ga.ī

zindagī tū ne satāyā mujhe har gaam bahut

khaa.e jaatī hai yahāñ merī hī tanhā.ī mujhe

yaad aate haiñ mujhe ghar ke dar-o-bām bahut

kaun aa.egā mire haq meñ gavāhī ke liye

chāk-e-dāmāñ pe lage haiñ mire ilzām bahut

qabr meñ fursat-e-hastī ko tarastā hai 'shakīl'

sochtā thā ki milegā vahāñ ārām bahut

ras aai hai mujhe gardish-e-ayyam bahut

umr bhar dil ne piye dard-bhare jam bahut

aaj phir KHud se sar-e-rah mulaqat hui

be-sabab KHud ko kiya aaj bhi badnam bahut

rang deti hai shafaq zaKHm-e-judai ko mere

yaad aata hai koi mujh ko sar-e-sham bahut

chand qatre jo meri chashm-e-tamanna se gire

der se aae magar aae mere kaam bahut

raat bhar hijr ki taswir-kashi karte rahe

raat bhar wasl se milta raha inam bahut

main ne us dida-e-pur-nam ko kai bar paDha

ashk-alud nigahon mein the paigham bahut

shiddat-e-dard ka ehsas baDhane ke liye

aaj aaya hai mere lab pe tera nam bahut

kis liye duniya faqat meri tamashai rahi

ishq mein log hua karte hain nakaam bahut

ishq ki ek KHata tujh se bhulai na gai

zindagi tu ne sataya mujhe har gam bahut

khae jati hai yahan meri hi tanhai mujhe

yaad aate hain mujhe ghar ke dar-o-baam bahut

kaun aaega mere haq mein gawahi ke liye

chaak-e-daman pe lage hain mere ilzam bahut

qabr mein fursat-e-hasti ko tarasta hai 'shakil'

sochta tha ki milega wahan aaram bahut