raat andheri shahar ki galiyon mein ab sannaTa hoga

raat añdherī shahar kī galiyoñ meñ ab sannāTā hogā

kyā ghar kī dahlīz pe ab tak raushan koī diyā hogā

merā ḳhālī kamra merī raah takegā raat tamām

ghar se bāhar raat guzārūñgā to vo tanhā hogā

maiñ vo shajar huuñ jis ko apne girne kā afsos nahīñ

mujh pe baserā karte haiñ jo panchhī un kā kyā hogā

maiñ na rahūñgā merī bāteñ yaad tumheñ jab ā.eñgī

rañg kabhī ruḳhsār kā uḌ jā.egā kabhī gahrā hogā

aag ke is paikar ko ḳhud apnī aag meñ jalte dekhā hai

tum ne samundar meñ sūraj ko Dūbte kab dekhā hogā

raat andheri shahar ki galiyon mein ab sannaTa hoga

kya ghar ki dahliz pe ab tak raushan koi diya hoga

mera KHali kamra meri rah takega raat tamam

ghar se bahar raat guzarunga to wo tanha hoga

main wo shajar hun jis ko apne girne ka afsos nahin

mujh pe basera karte hain jo panchhi un ka kya hoga

main na rahunga meri baaten yaad tumhein jab aaengi

rang kabhi ruKHsar ka uD jaega kabhi gahra hoga

aag ke is paikar ko KHud apni aag mein jalte dekha hai

tum ne samundar mein suraj ko Dubte kab dekha hoga