raat itni ja chuki hai aur sona hai abhi

raat itnī jā chukī hai aur sonā hai abhī

is nagar meñ ik ḳhushī kā ḳhvāb bonā hai abhī

kyuuñ diyā dil us but-e-kamsin ko aise vaqt meñ

dil sī shai jis ke liye bas ik khilaunā hai abhī

aisī yādoñ meñ ghire haiñ jin se kuchh hāsil nahīñ

aur kitnā vaqt un yādoñ meñ khonā hai abhī

jo huā honā hī thā so ho gayā hai dosto

daaġh is ahd-e-sitam kā dil se dhonā hai abhī

ham ne khilte dekhnā hai phir ḳhayābān-e-bahār

shahr ke atrāf kī miTTī meñ sonā hai abhī

baiTh jaa.eñ sāya-e-dāmān-e-ahmad meñ 'munīr'

aur phir socheñ vo bāteñ jin ko honā hai abhī

raat itni ja chuki hai aur sona hai abhi

is nagar mein ek KHushi ka KHwab bona hai abhi

kyun diya dil us but-e-kamsin ko aise waqt mein

dil si shai jis ke liye bas ek khilauna hai abhi

aisi yaadon mein ghire hain jin se kuchh hasil nahin

aur kitna waqt un yaadon mein khona hai abhi

jo hua hona hi tha so ho gaya hai dosto

dagh is ahd-e-sitam ka dil se dhona hai abhi

hum ne khilte dekhna hai phir KHayaban-e-bahaar

shahr ke atraf ki miTTi mein sona hai abhi

baiTh jaen saya-e-daman-e-ahmad mein 'munir'

aur phir sochen wo baaten jin ko hona hai abhi