aur koi dam ki mehman hai guzar jaegi raat

aur koī dam kī mehmāñ hai guzar jā.egī raat

Dhalte Dhalte āp-apnī maut mar jā.egī raat

zindagī meñ aur bhī kuchh zahr bhar jā.egī raat

ab agar Thahrī rag-o-pai meñ utar jā.egī raat

jo bhī haiñ parvarda-e-shab jo bhī haiñ zulmat parast

vo to jā.eñge usī jānib jidhar jā.egī raat

ahl-e-tūfāñ be-hisī kā gar yahī aalam rahā

mauj-e-ḳhūñ ban kar har ik sar se guzar jā.egī raat

hai ufuq se ek sañg-e-āftāb aane kī der

TuuT kar mānind-e-ā.īna bikhar jā.egī raat

ham to jaane kab se haiñ āvāra-e-zulmat magar

tum Thahar jaao to pal bhar meñ guzar jā.egī raat

raat kā anjām bhī ma.alūm hai mujh ko 'surūr'

laakh apnī had se guzre tā-sahar jā.egī raat

aur koi dam ki mehman hai guzar jaegi raat

Dhalte Dhalte aap-apni maut mar jaegi raat

zindagi mein aur bhi kuchh zahr bhar jaegi raat

ab agar Thahri rag-o-pai mein utar jaegi raat

jo bhi hain parwarda-e-shab jo bhi hain zulmat parast

wo to jaenge usi jaanib jidhar jaegi raat

ahl-e-tufan be-hisi ka gar yahi aalam raha

mauj-e-KHun ban kar har ek sar se guzar jaegi raat

hai ufuq se ek sang-e-aftab aane ki der

TuT kar manind-e-aina bikhar jaegi raat

hum to jaane kab se hain aawara-e-zulmat magar

tum Thahar jao to pal bhar mein guzar jaegi raat

raat ka anjam bhi malum hai mujh ko 'surur'

lakh apni had se guzre ta-sahar jaegi raat