raat tere KHwabon ne mujh par yun arzani ki

raat tire ḳhvāboñ ne mujh par yuuñ arzānī kī

saarī hasrat nikal ga.ī mirī tan-āsānī kī

paḌā huā huuñ shaam se maiñ isī bāġh-e-tāza meñ

mujh meñ shāḳh nikal aa.ī hai raat kī raanī kī

is chaupāl ke paas ik būḌhā bargad hotā thā

ek alāmat gum hai yahāñ se marī kahānī kī

tum ne kuchh paḌh kar phūñkā miTTī ke piyāle meñ

yā miTTī meñ guñdhī huī tāsīr hai paanī kī

kyā batlā.ūñ tum ko tum tak arz guzārne meñ

dil ne apne aap se kitnī khīñchā-tānī kī

raat tere KHwabon ne mujh par yun arzani ki

sari hasrat nikal gai meri tan-asani ki

paDa hua hun sham se main isi bagh-e-taza mein

mujh mein shaKH nikal aai hai raat ki rani ki

is chaupal ke pas ek buDha bargad hota tha

ek alamat gum hai yahan se mari kahani ki

tum ne kuchh paDh kar phunka miTTi ke piyale mein

ya miTTi mein gundhi hui tasir hai pani ki

kya batlaun tum ko tum tak arz guzarne mein

dil ne apne aap se kitni khincha-tani ki