raaton mein jab suni kabhi shahnai der tak

rātoñ meñ jab sunī kabhī shahnā.ī der tak

rag-rag meñ tere ġham ne lī añgḌā.ī der tak

sunte haiñ bazm-e-yār meñ chehre utar ga.e

kis ne vafā kī dāstāñ dohrā.ī der tak

ziine se āsmāñ ke utar aa.ī chāñdnī

āñgan meñ aa ke baiThī to sustā.ī der tak

ik muḳhtasar se lamhe ne pahchān chhīn lī

yuuñ to rahī hai un se shanāsā.ī der tak

miT miT ke naqsh dil pe ubharte rahe 'tapish'

zaḳhmoñ se kheltī rahī purvā.ī der tak

raaton mein jab suni kabhi shahnai der tak

rag-rag mein tere gham ne li angDai der tak

sunte hain bazm-e-yar mein chehre utar gae

kis ne wafa ki dastan dohrai der tak

zine se aasman ke utar aai chandni

aangan mein aa ke baiThi to sustai der tak

ek muKHtasar se lamhe ne pahchan chhin li

yun to rahi hai un se shanasai der tak

miT miT ke naqsh dil pe ubharte rahe 'tapish'

zaKHmon se khelti rahi purwai der tak