raaz-e-hasti tishna-e-tabir hai tere baghair

rāz-e-hastī tishna-e-ta.abīr hai tere baġhair

zindagī taqsīr hī taqsīr hai tere baġhair

ziist kī har kāmyābī bhī mirī nazroñ meñ ḳhaak

ek be-buniyād sī ta.amīr hai tere baġhair

jis ko honā chāhiye thā tāza-dam kaliyoñ kā haar

vo nafas kā silsila zanjīr hai tere baġhair

haañ vahī lab jo tabassum kā ḳhazāna thā kabhī

aaj rehn-e-nāla-e-shab-gīr hai tere baġhair

dil kī hālat hai ki jaise ik tilism-e-be-kalīd

har tamannā harf-e-be-ta.abīr hai tere baġhair

ho nahīñ paatī koī āsān sī mushkil bhī sahl

kund sā har nāḳhun-e-tadbīr hai tere baġhair

chāñd barsātā hai jab rātoñ ko amrit kī phuvār

haañ usī kī har laḌī ik tiir hai tere baġhair

raushnī us ke kisī ruḳh par bhī aa paatī nahīñ

zindagī dhundlī sī ik tasvīr hai tere baġhair

aa agar begāna-e-ehsās terā dil nahīñ

terā 'mullā' ḳhasta-o-dil-gīr hai tere baġhair

raaz-e-hasti tishna-e-tabir hai tere baghair

zindagi taqsir hi taqsir hai tere baghair

zist ki har kaamyabi bhi meri nazron mein KHak

ek be-buniyaad si tamir hai tere baghair

jis ko hona chahiye tha taza-dam kaliyon ka haar

wo nafas ka silsila zanjir hai tere baghair

han wahi lab jo tabassum ka KHazana tha kabhi

aaj rehn-e-nala-e-shab-gir hai tere baghair

dil ki haalat hai ki jaise ek tilism-e-be-kalid

har tamanna harf-e-be-tabir hai tere baghair

ho nahin pati koi aasan si mushkil bhi sahl

kund sa har naKHun-e-tadbir hai tere baghair

chand barsata hai jab raaton ko amrit ki phuwar

han usi ki har laDi ek tir hai tere baghair

raushni us ke kisi ruKH par bhi aa pati nahin

zindagi dhundli si ek taswir hai tere baghair

aa agar begana-e-ehsas tera dil nahin

tera 'mulla' KHasta-o-dil-gir hai tere baghair