raaz ka bazm mein charcha kabhi hone na diya

raaz kā bazm meñ charchā kabhī hone na diyā

ham ne apne ko tamāshā kabhī hone na diyā

ham ko is gardish-e-daurāñ ne kahīñ kā na rakhā

phir bhī lahje ko shikasta kabhī hone na diyā

mai-kade meñ baḌe kam-zarf the piine vaale

aañkh ko sāġhar o miinā kabhī hone na diyā

dil meñ ik dard kā tūfān chhupā.e rakkhā

aañkh se raaz ko ifshā kabhī hone na diyā

roz jalnā hai use roz jalānā hai use

ātish-e-shauq ko ThanDā kabhī hone na diyā

umr rishtoñ ke taqāze hī nibhāte guzrī

zindagī ne mujhe apnā kabhī hone na diyā

sab se mahfūz maqām-e-ġham-e-tanhā.ī hai

fikr-e-duniyā ne akelā kabhī hone na diyā

raaz ka bazm mein charcha kabhi hone na diya

hum ne apne ko tamasha kabhi hone na diya

hum ko is gardish-e-dauran ne kahin ka na rakha

phir bhi lahje ko shikasta kabhi hone na diya

mai-kade mein baDe kam-zarf the pine wale

aankh ko saghar o mina kabhi hone na diya

dil mein ek dard ka tufan chhupae rakkha

aankh se raaz ko ifsha kabhi hone na diya

roz jalna hai use roz jalana hai use

aatish-e-shauq ko ThanDa kabhi hone na diya

umr rishton ke taqaze hi nibhate guzri

zindagi ne mujhe apna kabhi hone na diya

sab se mahfuz maqam-e-gham-e-tanhai hai

fikr-e-duniya ne akela kabhi hone na diya