rab raTa ta-umr lekin rab samajh pae nahin

rab raTā tā-umr lekin rab samajh paa.e nahīñ

ishq kar ke ishq kā matlab samajh paa.e nahīñ

aap ko patthar kī mūrat meñ faqat patthar dikhā

aap sab kuchh jaan kar bhī sab samajh paa.e nahīñ

zindagī ne ishq kī bārīkiyāñ samjhā.ī par

jab samajhnā thā hameñ ham tab samajh paa.e nahīñ

kis liye āñkhoñ ne pahnā āñsūon kā pairahan

ye haqīqat muskurāte lab samajh paa.e nahīñ

har parā.ī shai ko apnā maan kar jiite rahe

aur apne aap ko ham sab samajh paa.e nahīñ

rab raTa ta-umr lekin rab samajh pae nahin

ishq kar ke ishq ka matlab samajh pae nahin

aap ko patthar ki murat mein faqat patthar dikha

aap sab kuchh jaan kar bhi sab samajh pae nahin

zindagi ne ishq ki barikiyan samjhai par

jab samajhna tha hamein hum tab samajh pae nahin

kis liye aankhon ne pahna aansuon ka pairahan

ye haqiqat muskuraate lab samajh pae nahin

har parai shai ko apna man kar jite rahe

aur apne aap ko hum sab samajh pae nahin