radif qafiya bandish KHayal lafz-gari

radīf qāfiya bandish ḳhayāl lafz-garī

vo huur ziina utarte hue sikhāne lagī

kitāb baab ġhazal she'r bait lafz hurūf

ḳhafīf raqs se dil par ubhāre mast parī

kalām aruuz taġhazzul ḳhayāl zauq-e-jamāl

badan ke jaam ne alfāz kī surāhī bharī

salīs shusta murassā nafīs narm ravāñ

dabā ke dāñtoñ meñ āñchal ġhazal uThā.ī ga.ī

qasīda she'r musaddas rubā.ī nazm ġhazal

mahakte hoñToñ kī tafsīr hai bhalī se bhalī

majāz qaid mo'amma shabīh istiqbāl

kisī se aañkh milāne meñ adbiyāt paḌhī

qarīna sarqa ishāra kināya ramz savāl

hayā se jhuktī nigāhoñ meñ jhāñkte the sabhī

bayān ilm-e-ma.ānī fasāhat ilm-e-balāġh

bayān kar nahīñ sakte kisī kī ek hañsī

qayās qaid tanāsub shabīh saj.a nazīr

kalī ko chūmā to jaise kalī kalī se milī

tarannum 'arz mukarrar sunā.iye irshād

kisī ne suniye kahā bazm jhuum jhuum ga.ī

huzūr qibla janāb aap dekhiye sāhab

kisī kī shaan meñ goyā luġhat banā.ī ga.ī

harīr atlas-o-kamḳhvāb pankhuḌī resham

kisī ke phuul se talvoñ se shāh-māt sabhī

gulāb ambar-o-raihān motiyā lobān

kisī kī zulf-e-mo'attar meñ sab kī ḳhushbū milī

kisī ke marmarīñ ā.īne meñ numāyāñ haiñ

ghaTā bahār dhanak chāñd phuul diip kalī

kisī kā ġhamza sharāboñ se chuur qaus-e-quzah

adā ġhurūr javānī surūr ishva-garī

kisī ke shīrīñ-laboñ se udhār lete haiñ

miThās shahd rutab chīnī qand misrī Dalī

kisī ke nuur ko chuñdhiyā ke dekheñ hairat se

charāġh jugnū sharar āftāb phūl-jhaḌī

kisī ko chaltā huā dekh leñ to chalte baneñ

ġhazāl mornī maujeñ nujūm abr ghaḌī

kisī kī madh-bharī āñkhoñ ke aage kuchh bhī nahīñ

thakan sharāb davā ġham ḳhumār nīm-shabī

kisī ke saath nahāte haiñ tez bārish meñ

libās gajre ufuq aañkh zulf hoñT hañsī

kisī kā bhīgā badan gul khilātā hai aksar

gulāb raanī kañval yāsmīn champā-kalī

ba-shart-e-fāl kisī ḳhaal par maiñ vāruñgā

chaman pahāḌ daman dasht jhiil ḳhushkī tarī

ye jaam chhalkā ki āñchal bahār kā Dhalkā

sharīr shosha sharāra shabāb shar shoḳhī

kisī kī tursh-ruī kā sabab yahī to nahīñ

achār lemuu. anaar aam TāTrī imlī

kisī ke husn ko bin māñge baaj dete haiñ

vazīr miir sipāhī faqīh zauq-e-shahī

nigāheñ chaar huiiñ vaqt hosh kho baiThā

sadī dahā.ī baras maah roz aaj abhī

vo ġhuncha yakjā hai chūñki varā-e-fikr-o-ḳhayāl

palak na jhapkeñ to dikhlā.ūñ pattī pattī abhī

siyāh zulf ghaTā jaal jaadū jang jalāl

fusūñ shabāb shikāran sharāb raat ghanī

jabīñ charāġh muqaddar kushāda dhuup sahar

ġhurūr qahr ta'ajjub kamāl nuur bharī

zarīf abrū ġhazab ġhamza ġhussa ġhaur ġhazal

ghamanD qaus qazā ishq tanz niim saḳhī

palak fasāna sharārat hijāb tiir duā

tamannā niiñd ishāra ḳhumār saḳht thakī

nazar ġhazāl mohabbat naqāb jhiil ajal

surūr-e-ishq taqaddus fareb-e-amr-o-nahī

nafīs naak nazākat sirāt 'adl bahār

jamīl sutvāñ mo'attar latīf ḳhushbū rachī

gulābī gaal shafaq seb surḳhī ġhāza kañval

tilism chaah bhañvar naaz sharm narm-garī

do lab aqiiq guhar pankhuḌī sharāb-e-kuhan

lazīz narm mulā.im sharīr bhīgī kalī

nashīlī ThoḌī tabassum tarāzū chāh-e-zaqan

ḳhamīda ḳhandāñ ḳhajista ḳhumār patlī galī

galā surāhī navā giit soz aah asar

tarañg chīḳh tarannum tarāna sur kī laḌī

hathelī reshmī nāzuk malā.ī narm latīf

hasīn marmarīñ sandal safed duudh dhulī

kamar ḳhayāl maTaktī kalī lachaktā shabāb

kamān TūTtī añgḌā.ī hashr jān-kanī

parī ke paaoñ gulābī gudāz raqs-parast

taḌaptī machhliyāñ mehrāb-e-lab thiraktī kalī

janāb dekhā sarāpā gulāb marmar kā

abhī ye she'r the sheroñ meñ chāñd utrā kabhī

ġhazal huzūr bas apne talak hī rakhiyegā

vo ruuTh jā.egā mujh se jo us kī dhuum machī

jhukā ke nazreñ koī bolā iltimās-e-duā

uThā ke haath vo ḳhairāt-e-husn dene lagī

kashish se husn kī chandā meñ uTThe madd-o-jazr

kisī ko saañs chaḌhā sab kī saañs phuul ga.ī

jo us pe buuñd girī abr kapkapā uTThā

is ek lamhe meñ kaafī gharoñ pe bijlī girī

qayāmat aa ga.ī ḳhushbū kī kaliyāñ chīḳh paḌīñ

gulāb bolā nahīñ ġhāliban vo zulf khulī

tavāf kartī hai mā'sūmiyat yuuñ kamsin kā

ki qatl kar de 'adālat meñ bhī to saaf barī

badan pe hāshiya likhnā nigāh par tafsīr

muqallidīn haiñ shoḳhī ke apnī shaiḳh ka.ī

tamām shahr meñ sīna-ba-sīna phail ga.ī

kisī ke bhīge laboñ se vabā-e-tishna-labī

gulāb aur aisā ki tanhā bahār le aa.e

bahisht meñ bhī hai gunjān shoḳh gul kī galī

kamāl-e-lailā to dekho ki sirf naam liyā

''phir us ke baa'd charāġhoñ meñ raushnī na rahī''

gulābī āñkhoñ meñ aise bhañvar the mastī ke

sharāb Duub ke un meñ bahut halāl lagī

jasārat 'aks pe lab rakhne kī nahīñ karte

bahut huā bhī to palkoñ se gudgudī kar dī

na jaane pahlī nazar kyuuñ halāl hotī hai

kisī ke husn pe pahlī nazar hī mahñgī paḌī

chaman meñ ''phūl na toḌeñ'' likhā thā so ham ne

gulāb-zādī ko pahnā dī titliyoñ kī laḌī

kisī kā zulf ko lahrā ke chalnā uf tauba

sharāb-e-nāb azal ke nashe meñ mast parī

vo boltā hai to kānoñ meñ shahd gholtā hai

marīz-e-qañd pe qadġhan hai us ko sunñe kī

kalī ko chhoḌ ke naqsh-e-qadam pe baiTh ga.ī

qalam hilā.e binā titlī ne ġhazal kah dī

sanam aur aisā ki but us ke aage jhuk jaa.eñ

duā dī us ne to do deviyoñ kī god bharī

atā-e-husn thī 'qais' ik jhalak meñ shoḳh ġhazal

kitāb likhtā maiñ us par magar vo phir na milī

radif qafiya bandish KHayal lafz-gari

wo hur zina utarte hue sikhane lagi

kitab bab ghazal she'r bait lafz huruf

KHafif raqs se dil par ubhaare mast pari

kalam aruz taghazzul KHayal zauq-e-jamal

badan ke jam ne alfaz ki surahi bhari

salis shusta murassa nafis narm rawan

daba ke danton mein aanchal ghazal uThai gai

qasida she'r musaddas rubai nazm ghazal

mahakte honTon ki tafsir hai bhali se bhali

majaz qaid mo'amma shabih istiqbaal

kisi se aankh milane mein adbiyat paDhi

qarina sarqa ishaara kinaya ramz sawal

haya se jhukti nigahon mein jhankte the sabhi

bayan ilm-e-maani fasahat ilm-e-balagh

bayan kar nahin sakte kisi ki ek hansi

qayas qaid tanasub shabih saja nazir

kali ko chuma to jaise kali kali se mili

tarannum 'arz mukarrar sunaiye irshad

kisi ne suniye kaha bazm jhum jhum gai

huzur qibla janab aap dekhiye sahab

kisi ki shan mein goya lughat banai gai

harir atlas-o-kamKHwab pankhuDi resham

kisi ke phul se talwon se shah-mat sabhi

gulab ambar-o-raihan motiya loban

kisi ki zulf-e-mo'attar mein sab ki KHushbu mili

kisi ke marmarin aaine mein numayan hain

ghaTa bahaar dhanak chand phul dip kali

kisi ka ghamza sharabon se chur qaus-e-quzah

ada ghurur jawani surur ishwa-gari

kisi ke shirin-labon se udhaar lete hain

miThas shahd rutab chini qand misri Dali

kisi ke nur ko chundhiya ke dekhen hairat se

charagh jugnu sharar aaftab phul-jhaDi

kisi ko chalta hua dekh len to chalte banen

ghazal morni maujen nujum abr ghaDi

kisi ki madh-bhari aankhon ke aage kuchh bhi nahin

thakan sharab dawa gham KHumar nim-shabi

kisi ke sath nahate hain tez barish mein

libas gajre ufuq aankh zulf honT hansi

kisi ka bhiga badan gul khilata hai aksar

gulab rani kanwal yasmin champa-kali

ba-shart-e-fal kisi KHal par main warunga

chaman pahaD daman dasht jhil KHushki tari

ye jam chhalka ki aanchal bahaar ka Dhalka

sharir shosha sharara shabab shar shoKHi

kisi ki tursh-rui ka sabab yahi to nahin

achaar lemu anar aam TaTri imli

kisi ke husn ko bin mange baj dete hain

wazir mir sipahi faqih zauq-e-shahi

nigahen chaar huin waqt hosh kho baiTha

sadi dahai baras mah roz aaj abhi

wo ghuncha yakja hai chunki wara-e-fikr-o-KHayal

palak na jhapken to dikhlaun patti patti abhi

siyah zulf ghaTa jal jadu jang jalal

fusun shabab shikaran sharab raat ghani

jabin charagh muqaddar kushada dhup sahar

ghurur qahr ta'ajjub kamal nur bhari

zarif abru ghazab ghamza ghussa ghaur ghazal

ghamanD qaus qaza ishq tanz nim saKHi

palak fasana shararat hijab tir dua

tamanna nind ishaara KHumar saKHt thaki

nazar ghazal mohabbat naqab jhil ajal

surur-e-ishq taqaddus fareb-e-amr-o-nahi

nafis nak nazakat siraat 'adl bahaar

jamil sutwan mo'attar latif KHushbu rachi

gulabi gal shafaq seb surKHi ghaza kanwal

tilism chah bhanwar naz sharm narm-gari

do lab aqiq guhar pankhuDi sharab-e-kuhan

laziz narm mulaim sharir bhigi kali

nashili ThoDi tabassum taraazu chah-e-zaqan

KHamida KHandan KHajista KHumar patli gali

gala surahi nawa git soz aah asar

tarang chiKH tarannum tarana sur ki laDi

hatheli reshmi nazuk malai narm latif

hasin marmarin sandal safed dudh dhuli

kamar KHayal maTakti kali lachakta shabab

kaman TuTti angDai hashr jaan-kani

pari ke paon gulabi gudaz raqs-parast

taDapti machhliyan mehrab-e-lab thirakti kali

janab dekha sarapa gulab marmar ka

abhi ye she'r the sheron mein chand utra kabhi

ghazal huzur bas apne talak hi rakhiyega

wo ruTh jaega mujh se jo us ki dhum machi

jhuka ke nazren koi bola iltimas-e-dua

uTha ke hath wo KHairaat-e-husn dene lagi

kashish se husn ki chanda mein uTThe madd-o-jazr

kisi ko sans chaDha sab ki sans phul gai

jo us pe bund giri abr kapkapa uTTha

is ek lamhe mein kafi gharon pe bijli giri

qayamat aa gai KHushbu ki kaliyan chiKH paDin

gulab bola nahin ghaaliban wo zulf khuli

tawaf karti hai ma'sumiyat yun kamsin ka

ki qatl kar de 'adalat mein bhi to saf bari

badan pe hashiya likhna nigah par tafsir

muqallidin hain shoKHi ke apni shaiKH kai

tamam shahr mein sina-ba-sina phail gai

kisi ke bhige labon se waba-e-tishna-labi

gulab aur aisa ki tanha bahaar le aae

bahisht mein bhi hai gunjaan shoKH gul ki gali

kamal-e-laila to dekho ki sirf nam liya

phir us ke ba'd charaghon mein raushni na rahi

gulabi aankhon mein aise bhanwar the masti ke

sharab Dub ke un mein bahut halal lagi

jasarat 'aks pe lab rakhne ki nahin karte

bahut hua bhi to palkon se gudgudi kar di

na jaane pahli nazar kyun halal hoti hai

kisi ke husn pe pahli nazar hi mahngi paDi

chaman mein phul na toDen likha tha so hum ne

gulab-zadi ko pahna di titliyon ki laDi

kisi ka zulf ko lahra ke chalna uf tauba

sharab-e-nab azal ke nashe mein mast pari

wo bolta hai to kanon mein shahd gholta hai

mariz-e-qand pe qadghan hai us ko sunne ki

kali ko chhoD ke naqsh-e-qadam pe baiTh gai

qalam hilae bina titli ne ghazal kah di

sanam aur aisa ki but us ke aage jhuk jaen

dua di us ne to do dewiyon ki god bhari

ata-e-husn thi 'qais' ek jhalak mein shoKH ghazal

kitab likhta main us par magar wo phir na mili