rafta rafta dil mein ek uljhan nai pate hain hum

rafta rafta dil meñ ik uljhan na.ī paate haiñ ham

ham ye samjhe the ki un ko bhūlte jaate haiñ ham

is ko kyā kiije ki ye bhī khel hai taqdīr kā

DhūñDhte haiñ jab unheñ apnā pata paate haiñ ham

chand aahoñ par hamārī hai pareshānī unheñ

saikḌoñ sadme haiñ jo ḳhāmosh pī jaate haiñ ham

aisī duniyā se shikāyat kyā gila kyā rañj kyā

phuul barsātī hai duniyā aag barsāte haiñ ham

be-talab husn-e-atā kī shaan hī kuchh aur hai

aap kahte haiñ to liije haath phailāte haiñ ham

apnī rūdād-e-alam kī ab vo manzil aa ga.ī

koī suntā ho na suntā ho kahe jaate haiñ ham

lījiye tark-e-ta.alluq kā tahayya kar liyā

dekhnā ye hai use kab tak nibhā paate haiñ ham

ai vafūr-e-zindagī talḳhāba-e-hastī na pūchh

zehn kī ḳhush-fahmiyoñ se dil ko bahlāte haiñ ham

ranjish-e-bejā ne un kī kar diyā aalam hī aur

zindagī ke naam kī goyā sazā paate haiñ ham

dost nā-ḳhush aqrabā nārāz barham ghar ke log

sach kā dāman thaam kar achchhā sila paate haiñ ham

kuchh ajab fitrat hai 'qādir' dard-e-dil kī āj-kal

jab koī detā hai taskīñ aur ghabrāte haiñ ham

rafta rafta dil mein ek uljhan nai pate hain hum

hum ye samjhe the ki un ko bhulte jate hain hum

is ko kya kije ki ye bhi khel hai taqdir ka

DhunDhte hain jab unhen apna pata pate hain hum

chand aahon par hamari hai pareshani unhen

saikDon sadme hain jo KHamosh pi jate hain hum

aisi duniya se shikayat kya gila kya ranj kya

phul barsati hai duniya aag barsate hain hum

be-talab husn-e-ata ki shan hi kuchh aur hai

aap kahte hain to lije hath phailate hain hum

apni rudad-e-alam ki ab wo manzil aa gai

koi sunta ho na sunta ho kahe jate hain hum

lijiye tark-e-talluq ka tahayya kar liya

dekhna ye hai use kab tak nibha pate hain hum

ai wafur-e-zindagi talKHaba-e-hasti na puchh

zehn ki KHush-fahmiyon se dil ko bahlate hain hum

ranjish-e-beja ne un ki kar diya aalam hi aur

zindagi ke nam ki goya saza pate hain hum

dost na-KHush aqraba naraaz barham ghar ke log

sach ka daman tham kar achchha sila pate hain hum

kuchh ajab fitrat hai 'qadir' dard-e-dil ki aaj-kal

jab koi deta hai taskin aur ghabraate hain hum