rafta rafta lag chuke the hum bhi diwaron ke sath

rafta rafta lag chuke the ham bhī dīvāroñ ke saath

hashr apnā bhī yahī thā ham bhī the sāroñ ke saath

ek halchal sī machī rahtī hai dil meñ har ghaḌī

saath haiñ pyāre hamāre ham nahīñ pyāroñ ke saath

lag ga.ī thī maut kī apnī bhī chhoTī sī ḳhabar

āḳhir apnā bhī ta.alluq thā in aḳhbāroñ ke saath

aa rahī hai un kī ḳhū bū apne andar bhī kahīñ

haiñ re.āyā hī magar rahte haiñ sardāroñ ke saath

farz kuchh pagḌī bachānā bhī hai lekin ek din

dekhnā sar bhī chale ā.eñge dastāroñ ke saath

duur se to farq hī koī nazar aatā nahīñ

is tarah rul mil ga.e haiñ phuul añgāroñ ke saath

ho ga.ī hai shakl hī tabdīl darbāroñ kī ab

varna ham bhī kam nahīñ vābasta darbāroñ ke saath

paḌ ga.e the rā.egāñ pahchān ke chakkar meñ ham

apnī marzī se jo ham uḌte nahīñ Dāroñ ke saath

be-ta.alluq bhī hai vo ham ne bhī hai ab tak 'zafar'

rābta joḌā huā TuuTe hue tāroñ ke saath

rafta rafta lag chuke the hum bhi diwaron ke sath

hashr apna bhi yahi tha hum bhi the saron ke sath

ek halchal si machi rahti hai dil mein har ghaDi

sath hain pyare hamare hum nahin pyaron ke sath

lag gai thi maut ki apni bhi chhoTi si KHabar

aaKHir apna bhi talluq tha in aKHbaron ke sath

aa rahi hai un ki KHu bu apne andar bhi kahin

hain reaya hi magar rahte hain sardaron ke sath

farz kuchh pagDi bachana bhi hai lekin ek din

dekhna sar bhi chale aaenge dastaron ke sath

dur se to farq hi koi nazar aata nahin

is tarah rul mil gae hain phul angaron ke sath

ho gai hai shakl hi tabdil darbaron ki ab

warna hum bhi kam nahin wabasta darbaron ke sath

paD gae the raegan pahchan ke chakkar mein hum

apni marzi se jo hum uDte nahin Daron ke sath

be-talluq bhi hai wo hum ne bhi hai ab tak 'zafar'

rabta joDa hua TuTe hue taron ke sath