raftagan ka bhi KHayal ai ahl-e-alam kijiye

raftagāñ kā bhī ḳhayāl ai ahl-e-ālam kījiye

ālam-e-arvāh se sohbat koī dam kījiye

hālat-e-ġham ko na bhūlā chāhiye shādī meñ bhī

ḳhanda-e-gul dekh kar yaad ashk-e-shabnam kījiye

aib-e-ulfat roz-e-avval se mirī tīnat meñ hai

dāġh-e-lāla ke liye kyā fikr-e-marham kījiye

apnī rāhat ke liye kis ko gavārā hai ye ranj

ghar banā kar gardan-e-mehrāb ko ḳham kījiye

ishq kahtā hai mujhe raam us but-e-vahshī ko kar

husn kī ġhairat use samjhātī hai ram kījiye

raat sohbat gul se din ko ham-baġhal ḳhurshīd se

rashk agar kiije to rashk-e-baḳht-e-shabnam kījiye

dīda-o-dil ko dikhāyā chāhiye dīdār-e-yār

husn ke aalam se ā.īnoñ ko mahram kījiye

shakl-e-gul hañs hañs ke roz-e-vasl kaaTe haiñ bahut

hijr kī shab sub.h ro kar misl-e-shabnam kījiye

thī sazā apnī jo shādī-marg qismat ne kiyā

hijr meñ kis ne kahā thā vasl kā ġham kījiye

aap kī nāzuk kamar par bojh paḌtā hai bahut

baḌh chale haiñ had se gesū kuchh inheñ kam kījiye

uTh ga.ī haiñ sāmne se kaisī kaisī sūrateñ

roiye kis ke liye kis kis kā mātam kījiye

roz mardum shab kiye detā hai surma pochhiye

ḳhuun hote haiñ bahut shauq-e-hinā kam kījiye

aa.ine ko rū-ba-rū aane na diije yaar ke

shāne se 'ātish' mizāj-e-zulf barham kījiye

raftagan ka bhi KHayal ai ahl-e-alam kijiye

aalam-e-arwah se sohbat koi dam kijiye

haalat-e-gham ko na bhula chahiye shadi mein bhi

KHanda-e-gul dekh kar yaad ashk-e-shabnam kijiye

aib-e-ulfat roz-e-awwal se meri tinat mein hai

dagh-e-lala ke liye kya fikr-e-marham kijiye

apni rahat ke liye kis ko gawara hai ye ranj

ghar bana kar gardan-e-mehrab ko KHam kijiye

ishq kahta hai mujhe ram us but-e-wahshi ko kar

husn ki ghairat use samjhati hai ram kijiye

raat sohbat gul se din ko ham-baghal KHurshid se

rashk agar kije to rashk-e-baKHt-e-shabnam kijiye

dida-o-dil ko dikhaya chahiye didar-e-yar

husn ke aalam se aainon ko mahram kijiye

shakl-e-gul hans hans ke roz-e-wasl kaTe hain bahut

hijr ki shab subh ro kar misl-e-shabnam kijiye

thi saza apni jo shadi-marg qismat ne kiya

hijr mein kis ne kaha tha wasl ka gham kijiye

aap ki nazuk kamar par bojh paDta hai bahut

baDh chale hain had se gesu kuchh inhen kam kijiye

uTh gai hain samne se kaisi kaisi suraten

roiye kis ke liye kis kis ka matam kijiye

roz mardum shab kiye deta hai surma pochhiye

KHun hote hain bahut shauq-e-hina kam kijiye

aaine ko ru-ba-ru aane na dije yar ke

shane se 'atish' mizaj-e-zulf barham kijiye