raftagan mein jahan ke hum bhi hain

raftagāñ meñ jahāñ ke ham bhī haiñ

saath us kārvāñ ke ham bhī haiñ

sham.a hī sar na de ga.ī barbād

kushta apnī zabāñ ke ham bhī haiñ

ham ko majnūñ ko ishq meñ mat buujh

nañg us ḳhāndāñ ke ham bhī haiñ

jis chaman-zār kā hai tū gul-e-tar

bulbul is gulsitāñ ke ham bhī haiñ

nahīñ majnūñ se dil qavī lekin

yaar us nā-tavāñ ke ham bhī haiñ

bosa mat de kisū ke dar pe nasīm

ḳhaak us āstāñ ke ham bhī haiñ

go shab us dar se duur pahroñ phireñ

paas to pāsbāñ ke ham bhī haiñ

vaj.h-e-begānagī nahīñ mālūm

tum jahāñ ke ho vaañ ke ham bhī haiñ

mar ga.e mar ga.e nahīñ to nahīñ

ḳhaak se muñh ko Dhāñke ham bhī haiñ

apnā sheva nahīñ kajī yuuñ to

yaar jī TeḌhe bāñke ham bhī haiñ

is sire kī hai pārsā.ī 'mīr'

mo'taqid us javāñ ke ham bhī haiñ

raftagan mein jahan ke hum bhi hain

sath us karwan ke hum bhi hain

shama hi sar na de gai barbaad

kushta apni zaban ke hum bhi hain

hum ko majnun ko ishq mein mat bujh

nang us KHandan ke hum bhi hain

jis chaman-zar ka hai tu gul-e-tar

bulbul is gulsitan ke hum bhi hain

nahin majnun se dil qawi lekin

yar us na-tawan ke hum bhi hain

bosa mat de kisu ke dar pe nasim

KHak us aastan ke hum bhi hain

go shab us dar se dur pahron phiren

pas to pasban ke hum bhi hain

wajh-e-beganagi nahin malum

tum jahan ke ho wan ke hum bhi hain

mar gae mar gae nahin to nahin

KHak se munh ko Dhanke hum bhi hain

apna shewa nahin kaji yun to

yar ji TeDhe banke hum bhi hain

is sire ki hai parsai 'mir'

mo'taqid us jawan ke hum bhi hain