rag-o-pai mein sarayat kar gaya wo

rag-o-pai meñ sarāyat kar gayā vo

mujhī ko mujh se ruḳhsat kar gayā vo

na Thahrā koī mausam vasl-e-jāñ kā

muta.ayyan raah furqat kar gayā vo

man o tū kī girī dīvār sar par

bayāñ kaisī haqīqat kar gayā vo

darūn-e-ḳhāna se ġhāfil hai lekin

barūn-e-ḳhāna zīnat kar gayā vo

sar-e-shab hī meñ aksar jal bujhā huuñ

har ik ḳhvāhish ko lat-pat kar gayā vo

havādis kā vo tund o shoḳh jhoñkā

samar dil kā akārat kar gayā vo

matā-e-ġham chhupā kar kyuuñ na rakkhūñ

havāle ye amānat kar gayā vo

tumheñ bhī bhūlne kī koshisheñ kiiñ

ki ḳhud par bhī qayāmat kar gayā vo

sukūñ-āmez lamhoñ meñ 'farīd' ab

faroġh-e-ranj-o-mehnat kar gayā vo

rag-o-pai mein sarayat kar gaya wo

mujhi ko mujh se ruKHsat kar gaya wo

na Thahra koi mausam wasl-e-jaan ka

mutayyan rah furqat kar gaya wo

man o tu ki giri diwar sar par

bayan kaisi haqiqat kar gaya wo

darun-e-KHana se ghafil hai lekin

barun-e-KHana zinat kar gaya wo

sar-e-shab hi mein aksar jal bujha hun

har ek KHwahish ko lat-pat kar gaya wo

hawadis ka wo tund o shoKH jhonka

samar dil ka akarat kar gaya wo

mata-e-gham chhupa kar kyun na rakkhun

hawale ye amanat kar gaya wo

tumhein bhi bhulne ki koshishen kin

ki KHud par bhi qayamat kar gaya wo

sukun-amez lamhon mein 'farid' ab

farogh-e-ranj-o-mehnat kar gaya wo