rag rag ek tasawwur ek umang bhare

rag rag ek tasavvur ek umañg bhare

ik ḳhushbū phūloñ meñ kyā kyā rañg bhare

fan kī apnī mauj dukhoñ kī apnī rau

ik tarkash meñ koī kitne ḳhadañg bhare

kaun lakīroñ ko tasvīroñ meñ Dhāle

kis kā lahū ye ḳhāke ye nairañg bhare

rañg-e-libās ko rañg-e-badan se aab mile

guñg hurūf meñ naġhmoñ kā āhañg bhare

kis kī āñkheñ tohmat-e-lams uThāeñgī

bijlī ke tan meñ haiñ kis ke rañg bhare

pole pole paañv dhare purvā.ī bhī

ḳhaak meñ uḌte rañg ye kis ke sañg bhare

kāhish kā dariyā bhī ḳhvāhish kā ghar thā

paanī bharne aa.e aur nahañg bhare

rag rag ek tasawwur ek umang bhare

ek KHushbu phulon mein kya kya rang bhare

fan ki apni mauj dukhon ki apni rau

ek tarkash mein koi kitne KHadang bhare

kaun lakiron ko taswiron mein Dhaale

kis ka lahu ye KHake ye nairang bhare

rang-e-libas ko rang-e-badan se aab mile

gung huruf mein naghmon ka aahang bhare

kis ki aankhen tohmat-e-lams uThaengi

bijli ke tan mein hain kis ke rang bhare

pole pole panw dhare purwai bhi

KHak mein uDte rang ye kis ke sang bhare

kahish ka dariya bhi KHwahish ka ghar tha

pani bharne aae aur nahang bhare