ragon mein meri shararon ka raqs jari hai

ragoñ meñ merī sharāroñ kā raqs jaarī hai

junūñ hai ranj hai ġham hai ki be-qarārī hai

dil-e-asīr ke zaḳhmoñ meñ kyā nahīñ maujūd

vafā hai ishq hai vahshat hai jāñ-nisārī hai

laboñ pe dasht hai āñkhoñ meñ ḳhuun ke dhabbe

samundaroñ se magar apnī rū-bakārī hai

adā-e-nāz se kartā hai zulm vo mujh par

use na ḳhauf-e-ḳhudā hai na sharmsārī hai

havā meñ ghultī huī ḳhushbuoñ ne farmāyā

gurez tum se nahīñ jag se parda-dārī hai

jise gale se lagāyā banā diyā sūraj

bulandiyoñ se kahīñ baḌh ke ḳhāksārī hai

thirak rahe haiñ muñDeroñ pe mor ḳhvāhish ke

vo jab se aaya hai dil meñ surūr taarī hai

tumhāre chehre se bahtā hai nuur kā jharnā

tumhārī zulfoñ se aalam meñ ābiyārī hai

falak se hotī hai nāzil duāoñ kī tanvīr

ibādatoñ se mirā rang-e-āh-o-zārī hai

qarīb aa ke kabhī dekho merī tanhā.ī

is intizār ke dāman meñ kyā ḳhumārī hai

parinde shāḳh se ik ek kar ke uḌte ga.e

hamīñ bache haiñ hamārī bhī ab ke baarī hai

badan to sūrat-e-dīvār ishtihār huā

zabāñ pe ishq ke chhāloñ kī lāla-kārī hai

Dhalī hai shaam bujhāne meñ aag sūraj kī

charāġh-e-dard jalāne meñ shab guzārī hai

hamāre ḳhvāb bhaTakte haiñ dasht-o-sahrā meñ

kise batā.eñ ki kyā aarzū hamārī hai

'nadīm' donoñ jahāñ us kī dostī pe nisār

usī se ranj usī se hī ġham-gusārī hai

ragon mein meri shararon ka raqs jari hai

junun hai ranj hai gham hai ki be-qarari hai

dil-e-asir ke zaKHmon mein kya nahin maujud

wafa hai ishq hai wahshat hai jaan-nisari hai

labon pe dasht hai aankhon mein KHun ke dhabbe

samundaron se magar apni ru-bakari hai

ada-e-naz se karta hai zulm wo mujh par

use na KHauf-e-KHuda hai na sharmsari hai

hawa mein ghulti hui KHushbuon ne farmaya

gurez tum se nahin jag se parda-dari hai

jise gale se lagaya bana diya suraj

bulandiyon se kahin baDh ke KHaksari hai

thirak rahe hain munDeron pe mor KHwahish ke

wo jab se aaya hai dil mein surur tari hai

tumhaare chehre se bahta hai nur ka jharna

tumhaari zulfon se aalam mein aabiyari hai

falak se hoti hai nazil duaon ki tanwir

ibaadaton se mera rang-e-ah-o-zari hai

qarib aa ke kabhi dekho meri tanhai

is intizar ke daman mein kya KHumari hai

parinde shaKH se ek ek kar ke uDte gae

hamin bache hain hamari bhi ab ke bari hai

badan to surat-e-diwar ishtihaar hua

zaban pe ishq ke chhaalon ki lala-kari hai

Dhali hai sham bujhane mein aag suraj ki

charagh-e-dard jalane mein shab guzari hai

hamare KHwab bhaTakte hain dasht-o-sahra mein

kise bataen ki kya aarzu hamari hai

'nadim' donon jahan us ki dosti pe nisar

usi se ranj usi se hi gham-gusari hai