rah-e-hasti mein koi rahnuma hona zaruri hai

rah-e-hastī meñ koī rahnumā honā zarūrī hai

safar kashtī kā ho to nāḳhudā honā zarūrī hai

tirī āñkhoñ meñ kuchh sharm-o-hayā honā zarūrī hai

darīda hī sahī sar par ridā honā zarūrī hai

jo nafrat ho to lāzim hai zabāñ par mohr-e-ḳhāmoshī

mohabbat hai to phir shikva-gila honā zarūrī hai

unhoñ ne jo bhī farmāyā thā vo sab ho chukā lekin

ḳhudā jaane jahāñ meñ aur kyā honā zarūrī hai

kahā rab ne nishāñ farsh-e-zamīñ par chhoḌne vaale

qarīb-e-arsh terā naqsh-e-pā honā zarūrī hai

milegī bil-yaqīñ tum ko baqā kī kāmrāñ manzil

kisī ke ishq meñ lekin fanā honā zarūrī hai

sipar bhī teġh bhī tan par zira-baktar sahī 'anvar'

barā.e jang dil meñ hausla honā zarūrī hai

rah-e-hasti mein koi rahnuma hona zaruri hai

safar kashti ka ho to naKHuda hona zaruri hai

teri aankhon mein kuchh sharm-o-haya hona zaruri hai

darida hi sahi sar par rida hona zaruri hai

jo nafrat ho to lazim hai zaban par mohr-e-KHamoshi

mohabbat hai to phir shikwa-gila hona zaruri hai

unhon ne jo bhi farmaya tha wo sab ho chuka lekin

KHuda jaane jahan mein aur kya hona zaruri hai

kaha rab ne nishan farsh-e-zamin par chhoDne wale

qarib-e-arsh tera naqsh-e-pa hona zaruri hai

milegi bil-yaqin tum ko baqa ki kaamran manzil

kisi ke ishq mein lekin fana hona zaruri hai

sipar bhi tegh bhi tan par zira-baktar sahi 'anwar'

barae jang dil mein hausla hona zaruri hai