rah-e-ishq mein gham-e-zindagi ki bhi zindagi safari rahi

rah-e-ishq meñ ġham-e-zindagī kī bhī zindagī safarī rahī

kabhī nazr-e-ḳhāk-e-safar rahī kabhī motiyoñ se bharī rahī

tirī ik nigāh se sāqiyā vo bahār-e-be-ḳhabarī rahī

gul-e-tar vahī gul-e-tar rahā vahī Daal Daal harī rahī

tirī be-ruḳhī kī nigāh thī ki jo har ḳhatā se barī rahī

mirī aarzū kī sharāb thī ki jo jaam jaam bharī rahī

dam-e-marg bhī mirī hasrateñ had-e-ārzū se na baḌh sakīñ

usī kaale dev kī qaid meñ mire bachpane kī parī rahī

dil-e-ġham-zada pe guzar gayā hai vo hādsa ki mire liye

na to ġham rahā na ḳhushī rahī na junūñ rahā na parī rahī

vahī 'tarz' tujh pe rahīm hai ye usī kā faiz-e-karīm hai

ki asātiza ke bhī rañg meñ jo ġhazal kahī vo kharī rahī

rah-e-ishq mein gham-e-zindagi ki bhi zindagi safari rahi

kabhi nazr-e-KHak-e-safar rahi kabhi motiyon se bhari rahi

teri ek nigah se saqiya wo bahaar-e-be-KHabari rahi

gul-e-tar wahi gul-e-tar raha wahi Dal Dal hari rahi

teri be-ruKHi ki nigah thi ki jo har KHata se bari rahi

meri aarzu ki sharab thi ki jo jam jam bhari rahi

dam-e-marg bhi meri hasraten had-e-arzu se na baDh sakin

usi kale dew ki qaid mein mere bachpane ki pari rahi

dil-e-gham-zada pe guzar gaya hai wo hadsa ki mere liye

na to gham raha na KHushi rahi na junun raha na pari rahi

wahi 'tarz' tujh pe rahim hai ye usi ka faiz-e-karim hai

ki asatiza ke bhi rang mein jo ghazal kahi wo khari rahi