rah-e-ishq mein zindagani luTa di

rah-e-ishq meñ zindagānī luTā dī

milī jāvedānī to faanī luTā dī

vo thī ḳhvāh baaqī ki faanī luTā dī

tire naam par zindagānī luTā dī

mohabbat kī ik nā-murādī kī ḳhātir

zamāne kī har shādmānī luTā dī

dil-e-zār ne tere jalvoñ ke aage

tavānā.ī-o-nā-tavānī luTā dī

ḳhudī jis meñ bastī vo bastī to dil ne

ba-taqrīb-e-yak lan-tarānī luTā dī

batā.ī bahut qadr izzat kī ham ne

magar ek dil ne na maanī luTā dī

mirā jurm kyā hai ki barham haiñ nāseh

luTāne kī shai thī javānī luTā dī

gayā ziist ke saath dāġh-e-alam bhī

ḳhajil huuñ ki un kī nishānī luTā dī

magar hāl-e-dil sher meñ un se kah luuñ

tabī.at kī saarī ravānī luTā dī

ba-farmā.ish-e-yār-e-dam-sāz maiñ ne

'rashīd' aaj jādū-bayānī luTā dī

rah-e-ishq mein zindagani luTa di

mili jawedani to fani luTa di

wo thi KHwah baqi ki fani luTa di

tere nam par zindagani luTa di

mohabbat ki ek na-muradi ki KHatir

zamane ki har shadmani luTa di

dil-e-zar ne tere jalwon ke aage

tawanai-o-na-tawani luTa di

KHudi jis mein basti wo basti to dil ne

ba-taqrib-e-yak lan-tarani luTa di

batai bahut qadr izzat ki hum ne

magar ek dil ne na mani luTa di

mera jurm kya hai ki barham hain naseh

luTane ki shai thi jawani luTa di

gaya zist ke sath dagh-e-alam bhi

KHajil hun ki un ki nishani luTa di

magar haal-e-dil sher mein un se kah lun

tabiat ki sari rawani luTa di

ba-farmaish-e-yar-e-dam-saz main ne

'rashid' aaj jadu-bayani luTa di