rah-e-jaanan pe baDhti ja rahi hun

rah-e-jānāñ pe baḌhtī jā rahī huuñ

magar ḳhud se bichhaḌtī jā rahī huuñ

anokhe shahr mujh par vā hue haiñ

kitāb-e-zāt paḌhtī jā rahī huuñ

mire maulā use ābād rakhnā

mirā kyā hai ujaḌtī jā rahī huuñ

mirī nashv-o-numā jis se huī hai

usī jaḌ se ukhaḌtī jā rahī huuñ

huā mā'lūm mujh ko āḳhir-e-shab

ki maiñ be-samt baḌhtī jā rahī huuñ

burā hai vo magar itnā nahīñ hai

yūñhī us se bigaḌtī jā rahī huuñ

kahāñ le jā rahā hai mujh ko 'suġhrā'

muqaddar se jhagaḌtī jā rahī huuñ

rah-e-jaanan pe baDhti ja rahi hun

magar KHud se bichhaDti ja rahi hun

anokhe shahr mujh par wa hue hain

kitab-e-zat paDhti ja rahi hun

mere maula use aabaad rakhna

mera kya hai ujaDti ja rahi hun

meri nashw-o-numa jis se hui hai

usi jaD se ukhaDti ja rahi hun

hua ma'lum mujh ko aaKHir-e-shab

ki main be-samt baDhti ja rahi hun

bura hai wo magar itna nahin hai

yunhi us se bigaDti ja rahi hun

kahan le ja raha hai mujh ko 'sughra'

muqaddar se jhagaDti ja rahi hun