rah-e-KHirad mein jahan sar hai dard-e-sar bhi hai

rah-e-ḳhirad meñ jahāñ sar hai dard-e-sar bhī hai

ki gū-magū bhī agar bhī hai aur magar bhī hai

faqīh-e-shahr muazzaz bhī mo'atabar bhī hai

magar marāsim-e-ulfat se be-ḳhabar bhī hai

tirī nazar ki nazar bhī nahīñ nazar bhī hai

jise hamārī ḳhabar bhī nahīñ ḳhabar bhī hai

yahāñ kī qaid se ghabrā rahā hai dīvāna

ki is dayār meñ dīvār bhī hai dar bhī hai

jahān-e-āriz-o-gesū ajiib duniyā hai

ki jis meñ shaam bhī hai saath hī sahar bhī hai

ye dil kī vādī-e-aiman meñ kaun aa utrā

ki jo jamāl-e-nahufta bhī jalva-gar bhī hai

jo raah ahl-e-ḳhirad ke liye hai lā-mahdūd

junūn-e-jazba-e-ulfat meñ muḳhtasar bhī hai

rah-e-KHirad mein jahan sar hai dard-e-sar bhi hai

ki gu-magu bhi agar bhi hai aur magar bhi hai

faqih-e-shahr muazzaz bhi mo'atabar bhi hai

magar marasim-e-ulfat se be-KHabar bhi hai

teri nazar ki nazar bhi nahin nazar bhi hai

jise hamari KHabar bhi nahin KHabar bhi hai

yahan ki qaid se ghabra raha hai diwana

ki is dayar mein diwar bhi hai dar bhi hai

jahan-e-ariz-o-gesu ajib duniya hai

ki jis mein sham bhi hai sath hi sahar bhi hai

ye dil ki wadi-e-aiman mein kaun aa utra

ki jo jamal-e-nahufta bhi jalwa-gar bhi hai

jo rah ahl-e-KHirad ke liye hai la-mahdud

junun-e-jazba-e-ulfat mein muKHtasar bhi hai