rah rah ke zabani kabhi tahrir se humne

rah rah ke zabānī kabhī tahrīr se ham ne

qaa.el kiyā us ko isī tadbīr se ham ne

kis samt liye jaate ho aur kyā hai irāda

pūchhā na kabhī apne ināñ-gīr se ham ne

dil par koī qaabū na rahā jab to kisī taur

bāñdhā hai ye vahshī tirī zanjīr se ham ne

har baar madad ke liye auroñ ko pukārā

yā kaam liyā nāra-e-takbīr se ham ne

behtar hai ki ab kaam koī aur kiyā kar

ye bhī na kahā kātib taqdīr se ham ne

apnī hī karāmāt dikhāte rahe sab ko

sarqa na kiyā mojaza-e-'mīr' se ham ne

taḳhrīb to karte rahe sau tarha kī lekin

ye kaam kiyā jazba-e-tāmīr se ham ne

ab dekhiye kyā is kā nikaltā hai natīja

māthā hai lagāyā huā tāsīr se ham ne

vo bām-e-tamāshā huā ġhā.eb to 'zafar' aaj

laTkā liyā ḳhud ko kisī shahtīr se ham ne

rah rah ke zabani kabhi tahrir se hum ne

qael kiya us ko isi tadbir se hum ne

kis samt liye jate ho aur kya hai irada

puchha na kabhi apne inan-gir se hum ne

dil par koi qabu na raha jab to kisi taur

bandha hai ye wahshi teri zanjir se hum ne

har bar madad ke liye auron ko pukara

ya kaam liya nara-e-takbir se hum ne

behtar hai ki ab kaam koi aur kiya kar

ye bhi na kaha katib taqdir se hum ne

apni hi karamat dikhate rahe sab ko

sarqa na kiya mojaza-e-'mir' se hum ne

taKHrib to karte rahe sau tarha ki lekin

ye kaam kiya jazba-e-tamir se hum ne

ab dekhiye kya is ka nikalta hai natija

matha hai lagaya hua tasir se hum ne

wo baam-e-tamasha hua ghaeb to 'zafar' aaj

laTka liya KHud ko kisi shahtir se hum ne