rahe dil ki dil mein zaban tak na pahunche

rahe dil kī dil meñ zabāñ tak na pahuñche

mirā ġham hudūd-e-bayāñ tak na pahuñche

ye hastī na ho be-ḳhudī rafta rafta

kahīñ ḳhvāb ḳhvāb-e-girāñ tak na pahuñche

tirā martaba ai zamīñ allah allāh

tirī gard ko āsmāñ tak na pahuñche

diyā to mirī aarzū kā jale aur

ujālā kisī ke makāñ tak na pahuñche

yahī ab hai behtar ki chup saadh liije

koī baat phir dāstāñ tak na pahuñche

na chheḌeñ vo tār-e-rag-e-jāñ 'sa.ādat'

kahīñ naġhma-e-dil fuġhāñ tak na pahuñche

rahe dil ki dil mein zaban tak na pahunche

mera gham hudud-e-bayan tak na pahunche

ye hasti na ho be-KHudi rafta rafta

kahin KHwab KHwab-e-giran tak na pahunche

tera martaba ai zamin allah allah

teri gard ko aasman tak na pahunche

diya to meri aarzu ka jale aur

ujala kisi ke makan tak na pahunche

yahi ab hai behtar ki chup sadh lije

koi baat phir dastan tak na pahunche

na chheDen wo tar-e-rag-e-jaan 'saadat'

kahin naghma-e-dil fughan tak na pahunche