rahe salamat gham-e-mohabbat kahan kahan apne kaam aaya

rahe salāmat ġham-e-mohabbat kahāñ kahāñ apne kaam aayā

sanam-parastoñ meñ zikr niklā ḳhudā-parastoñ meñ naam aayā

kahūñ maiñ kyoñ bevafā kisī ko vo mujh se be-ruḳh na be-ḳhabar hai

hamesha us kī taraf se mujh ko salām pahuñchā payām aayā

mirī taraf se guzarne vaale na dekh mujh ko palaT palaT kar

maiñ vo nahīñ huuñ ki jo pukāre huzūr Thahreñ ġhulām aayā

surūr-o-mastī huuñ meñ sarāpā ye raaz kyā hai ḳhudā hī jaane

na maiñ ne dekhī subū kī sūrat na mere hisse meñ jaam aayā

lahū diyā thā jinhoñ ne apnā rahe vo mahrūm apne haq se

tamām sarmāya-e-bahārāñ chaman-faroshoñ ke kaam aayā

vo dekho parcham sanam-kade kā nazar meñ tasvīr khiñch ga.ī hai

chalo 'musavvir' qadam baḌhāo baḌā muqaddas maqām aayā

rahe salamat gham-e-mohabbat kahan kahan apne kaam aaya

sanam-paraston mein zikr nikla KHuda-paraston mein nam aaya

kahun main kyon bewafa kisi ko wo mujh se be-ruKH na be-KHabar hai

hamesha us ki taraf se mujh ko salam pahuncha payam aaya

meri taraf se guzarne wale na dekh mujh ko palaT palaT kar

main wo nahin hun ki jo pukare huzur Thahren ghulam aaya

surur-o-masti hun mein sarapa ye raaz kya hai KHuda hi jaane

na main ne dekhi subu ki surat na mere hisse mein jam aaya

lahu diya tha jinhon ne apna rahe wo mahrum apne haq se

tamam sarmaya-e-bahaaran chaman-faroshon ke kaam aaya

wo dekho parcham sanam-kade ka nazar mein taswir khinch gai hai

chalo 'musawwir' qadam baDhao baDa muqaddas maqam aaya