rahguzar ke sath ek hamrah bhi to chahiye

rahguzar ke saath ik hamrāh bhī to chāhiye

aur āġhāz-e-safar ko chaah bhī to chāhiye

nāz-o-andāz-o-adā ye ishq ke rahbar haiñ sab

ham ko is tūfāñ kī lekin thaah bhī to chāhiye

āh-o-giryā sog mātam shā.irī meñ kar ke nazm

apnī ayyārī pe ab kuchh vaah bhī to chāhiye

maslahat allāh kī kuchh hogī dard-e-ishq meñ

hai sukūñ kī baat par allāh bhī to chāhiye

jiit un kī hai ki jo karte nahīñ iz.hār-e-dard

zulm ko sar chāhiye par aah bhī to chāhiye

kab tak āḳhir karte jaa.eñ ham ye kār-e-intizār

saal meñ do saal meñ tanḳhvāh bhī to chāhiye

ḳhud-kushī ik āḳhirī koshish hai zinda rahne kī

ḳhud-kushī karne ko ik parvāh bhī to chāhiye

rahguzar ke sath ek hamrah bhi to chahiye

aur aaghaz-e-safar ko chah bhi to chahiye

naz-o-andaz-o-ada ye ishq ke rahbar hain sab

hum ko is tufan ki lekin thah bhi to chahiye

aah-o-girya sog matam shairi mein kar ke nazm

apni ayyari pe ab kuchh wah bhi to chahiye

maslahat allah ki kuchh hogi dard-e-ishq mein

hai sukun ki baat par allah bhi to chahiye

jit un ki hai ki jo karte nahin izhaar-e-dard

zulm ko sar chahiye par aah bhi to chahiye

kab tak aaKHir karte jaen hum ye kar-e-intizar

sal mein do sal mein tanKHwah bhi to chahiye

KHud-kushi ek aaKHiri koshish hai zinda rahne ki

KHud-kushi karne ko ek parwah bhi to chahiye