rahi hai parda-e-ulfat mein maslahat kya kya

rahī hai parda-e-ulfat meñ maslahat kyā kyā

adāvatoñ meñ huī hai mufāhamat kyā kyā

mire aziiz vatan kī fazā ne bhar dī hai

mirī sarisht ke andar munāfiqat kyā kyā

kabhī usuul kī ġhairat kabhī ziyāñ kā savāl

dimāġh-o-dil meñ rahī hai mushāvrat kyā kyā

sadā-e-dil ko tah-e-dil meñ qaid kar ke rakhā

rahā hai tauq-e-gulū shauq-e-āfiyat kyā kyā

mahak thamī jo lahū kī to chauñk kar ham ne

havā se pūchhī hai zaḳhmoñ kī ḳhairiyat kyā kyā

bahut aziiz haiñ āñkhoñ kī putliyāñ lekin

mile haiñ dukh bhī mujhe un kī ma.arifat kyā kyā

bahut dinoñ meñ kal ā.īna sāmne pā kar

huī hai umr-e-guzishta kī ta.aziyat kyā kyā

aTā huā ba-sar-o-chehra sīm-o-zar kā ġhubār

milī hai lāsha-e-afkār kī diyat kyā kyā

nihāñ hai tarkash-e-imkāñ meñ nāvak-e-taqdīr

mudām sar pe sitāre haiñ an-ginat kyā kyā

rahi hai parda-e-ulfat mein maslahat kya kya

adawaton mein hui hai mufahamat kya kya

mere aziz watan ki faza ne bhar di hai

meri sarisht ke andar munafiqat kya kya

kabhi usul ki ghairat kabhi ziyan ka sawal

dimagh-o-dil mein rahi hai mushawrat kya kya

sada-e-dil ko tah-e-dil mein qaid kar ke rakha

raha hai tauq-e-gulu shauq-e-afiyat kya kya

mahak thami jo lahu ki to chaunk kar hum ne

hawa se puchhi hai zaKHmon ki KHairiyat kya kya

bahut aziz hain aankhon ki putliyan lekin

mile hain dukh bhi mujhe un ki marifat kya kya

bahut dinon mein kal aaina samne pa kar

hui hai umr-e-guzishta ki taziyat kya kya

aTa hua ba-sar-o-chehra sim-o-zar ka ghubar

mili hai lasha-e-afkar ki diyat kya kya

nihan hai tarkash-e-imkan mein nawak-e-taqdir

mudam sar pe sitare hain an-ginat kya kya