rahiye ahbab se kaT kar ki waba ke din hain

rahiye ahbāb se kaT kar ki vabā ke din haiñ

saañs bhī lījiye haT kar ki vabā ke din haiñ

vo jinheñ ḳhud se bhī milne kī nahīñ thī fursat

rah ga.e ḳhud meñ simaT kar ki vabā ke din haiñ

raunaq-e-bazm-e-jahāñ ḳhud ko samajhne vaale

aa ga.e ghar ko palaT kar ki vabā ke din haiñ

kyā kisī aur se ab harf-e-tasallī kahiye

roiye ḳhud se lipaT kar ki vabā ke din haiñ

ek jhaTke meñ hue shāh-o-gadā zer-o-zabar

rah ga.ī duniyā ulaT kar ki vabā ke din haiñ

sab ko mālūm hai ta.abīr to yaksāñ hogī

ḳhvāb hī dekh leñ haT kar ki vabā ke din haiñ

ek kamre meñ simaT aa.ī hai saarī duniyā

rah ga.e ḳhānoñ meñ baT kar ki vabā ke din haiñ

ye mirā rañg-e-taġhazzul to nahīñ hai lekin

ik ġhazal likkhī hai haT kar ki vabā ke din haiñ

rahiye ahbab se kaT kar ki waba ke din hain

sans bhi lijiye haT kar ki waba ke din hain

wo jinhen KHud se bhi milne ki nahin thi fursat

rah gae KHud mein simaT kar ki waba ke din hain

raunaq-e-bazm-e-jahan KHud ko samajhne wale

aa gae ghar ko palaT kar ki waba ke din hain

kya kisi aur se ab harf-e-tasalli kahiye

roiye KHud se lipaT kar ki waba ke din hain

ek jhaTke mein hue shah-o-gada zer-o-zabar

rah gai duniya ulaT kar ki waba ke din hain

sab ko malum hai tabir to yaksan hogi

KHwab hi dekh len haT kar ki waba ke din hain

ek kamre mein simaT aai hai sari duniya

rah gae KHanon mein baT kar ki waba ke din hain

ye mera rang-e-taghazzul to nahin hai lekin

ek ghazal likkhi hai haT kar ki waba ke din hain