rahta hai mere dil mein tera nur raat din

rahtā hai mere dil meñ tirā nuur raat din

ik sho.ala barq-zan hai sar-e-tūr raat din

mānind mehr-o-māh hasīnoñ meñ hai firāq

kyuuñ ek ek se na rahe duur raat din

ham ne milā.ī aañkh ye muñh hai sahāb kā

jaarī hai zaḳhm-e-chashm kā nāsūr raat din

tere liye misāl-e-mah-o-mehr-o-najm-o-charḳh

phirte haiñ lunj-o-lañg-o-kar-o-kor raat din

kuchh ġham firāq kā hai na kuchh vasl kī ḳhushī

huuñ us ke zauq-o-shauq meñ masrūr raat din

muñh kis kā merā zikr kare us ke rū-ba-rū

rahtā hai varna ḳhalq kā mazkūr raat din

ḳhvāhish har aa.ina hai udhar bhī nazar rahe

go ā.īna nazar ke hai manzūr raat din

dil meñ jo bas rahī hai koī nāznīñ hasīñ

phirtī hai merī āñkhoñ meñ ik huur raat din

sozish hai dāġh-e-hijr meñ is se sivā 'vaqār'

bhartā huuñ jitnā marham-e-kāfūr raat din

rahta hai mere dil mein tera nur raat din

ek shoala barq-zan hai sar-e-tur raat din

manind mehr-o-mah hasinon mein hai firaq

kyun ek ek se na rahe dur raat din

hum ne milai aankh ye munh hai sahab ka

jari hai zaKHm-e-chashm ka nasur raat din

tere liye misal-e-mah-o-mehr-o-najm-o-charKH

phirte hain lunj-o-lang-o-kar-o-kor raat din

kuchh gham firaq ka hai na kuchh wasl ki KHushi

hun us ke zauq-o-shauq mein masrur raat din

munh kis ka mera zikr kare us ke ru-ba-ru

rahta hai warna KHalq ka mazkur raat din

KHwahish har aaina hai udhar bhi nazar rahe

go aaina nazar ke hai manzur raat din

dil mein jo bas rahi hai koi naznin hasin

phirti hai meri aankhon mein ek hur raat din

sozish hai dagh-e-hijr mein is se siwa 'waqar'

bharta hun jitna marham-e-kafur raat din