rakh mujhe mauj mein tu zinat-e-sahil na bana

rakh mujhe mauj meñ tū zīnat-e-sāhil na banā

zindagī ek safar hai ise manzil na banā

jitne mausam bhī guzāre ġham-e-hijrāñ ke baġhair

un meñ ik pal bhī mirī ziist kā hāsil na banā

mujh ko vaa.iz na paḌhā tark-e-tamannā kā sabaq

maiñ to dīvāna bhalā huuñ mujhe aaqil na banā

zindagī maiñ ne guzārī usī dar par lekin

sang-e-dahlīz rahā sohbat-e-mahfil na banā

apne me.aar pe hī ḳhud ko parakhnā sīkho

mujhe dekho maiñ kisī kā bhī muqābil na banā

go yaqīñ thā mirā mohkam pa tan-āsānī meñ

ye jo dil hai ye mirā murshid-e-kāmil na banā

ye alag baat ki apnī sī ġhazal to kah lī

bante bante meñ ḳhayāl-e-dil-e-'ādil' na banā

rakh mujhe mauj mein tu zinat-e-sahil na bana

zindagi ek safar hai ise manzil na bana

jitne mausam bhi guzare gham-e-hijran ke baghair

un mein ek pal bhi meri zist ka hasil na bana

mujh ko waiz na paDha tark-e-tamanna ka sabaq

main to diwana bhala hun mujhe aaqil na bana

zindagi main ne guzari usi dar par lekin

sang-e-dahliz raha sohbat-e-mahfil na bana

apne mear pe hi KHud ko parakhna sikho

mujhe dekho main kisi ka bhi muqabil na bana

go yaqin tha mera mohkam pa tan-asani mein

ye jo dil hai ye mera murshid-e-kaamil na bana

ye alag baat ki apni si ghazal to kah li

bante bante mein KHayal-e-dil-e-'adil' na bana