rakhe hain chaak-e-zaman par fana baqa aur main

rakhe haiñ chāk-e-zamāñ par fanā baqā aur maiñ

umaD rahe haiñ tamāshā-e-nāravā aur maiñ

phir ek roz ḳhalā bhar gayā thā kamre meñ

ki jazb ho ga.e dīvār meñ sadā aur maiñ

charāġh bujhte rahe aur shahr jalte rahe

sukūt oḌh ke baiThe rahe ḳhudā aur maiñ

ye dasht aaj bhī ham se hai be-ḳhabar afsos

kahāñ kī ḳhaak uḌāte rahe havā aur maiñ

badan kī naav thī girdāb-e-lams joban meñ

ajab ḳhumār meñ Duube the nāḳhudā aur maiñ

thā irtiqā-e-suḳhan koī ḳhāmushī kā amal

hue haiñ vaqf-e-tahayyur mirī navā aur maiñ

zarā sī der mirā dhyān baT gayā thā kahīñ

bujhe mile haiñ kisī aañkh meñ diyā aur maiñ

kuchh is tarah se huā kam hamārā ḳhālī-pan

ki ek dūsre meñ bhar ga.e ḳhalā aur maiñ

abhī ḳhayāl hai tajsīm kī nazar se pare

abhī haiñ ret meñ mastūr aa.ina aur maiñ

rakhe hain chaak-e-zaman par fana baqa aur main

umaD rahe hain tamasha-e-narawa aur main

phir ek roz KHala bhar gaya tha kamre mein

ki jazb ho gae diwar mein sada aur main

charagh bujhte rahe aur shahr jalte rahe

sukut oDh ke baiThe rahe KHuda aur main

ye dasht aaj bhi hum se hai be-KHabar afsos

kahan ki KHak uDate rahe hawa aur main

badan ki naw thi girdab-e-lams joban mein

ajab KHumar mein Dube the naKHuda aur main

tha irtiqa-e-suKHan koi KHamushi ka amal

hue hain waqf-e-tahayyur meri nawa aur main

zara si der mera dhyan baT gaya tha kahin

bujhe mile hain kisi aankh mein diya aur main

kuchh is tarah se hua kam hamara KHali-pan

ki ek dusre mein bhar gae KHala aur main

abhi KHayal hai tajsim ki nazar se pare

abhi hain ret mein mastur aaina aur main