rakho wo shewa na madd-e-nazar nazar mein rahe

rakho vo sheva na madd-e-nazar nazar meñ rahe

ki jis se rāz-e-mohabbat bashar bashar meñ rahe

chaman jo ban ke tirā rahguzar guzar meñ rahe

to naḳhl-e-tūr kā jalva shajar shajar meñ rahe

aziiz tar hai agar ho sarishk meñ tāsīr

latīf-tar hai jo āb-e-guhar guhar meñ rahe

udhar tamām kiyā āsmāñ ne apnā kaam

idhar phañse hue ahl-e-hunar hunar meñ rahe

vufūr-e-ġham se ye jī meñ hai roiye is tarah

na dil meñ haal na ḳhūn-e-jigar jigar meñ rahe

burī ḳhabar ho to is tarah nāma-bar kahnā

ki sidq-o-kizb kā shak be-ḳhabar ḳhabar meñ rahe

samajh ke ishq kar ai dil ki kyā nahīñ ma.alūm

jo sochte nahīñ naf-o-zarar zarar meñ rahe

uThāo qabr meñ bhī lazzat-e-ḳhalish tā-hashr

ḳhudā kare ki ḳhadañg-e-jigar jigar meñ rahe

vafā hamārī sitam aap ke kuchh aise hoñ

ki muddatoñ yahī charchā bashar bashar meñ rahe

shab-e-firāq milī tīra-rozgārī meñ

sahar guzar ga.ī aur ham sahar meñ rahe

ham un kī bazm meñ baiThe rahe va-lekin yuuñ

ki jaise rahrav-e-rāh-e-ḳhatar ḳhatar meñ rahe

khiche jo siine se naala to chāhiye ai dil

misāl-e-ma.anī-e-lafz-e-asar asar meñ rahe

shab-e-visāl kī yārab na raushnī kam ho

vo nūr-e-āriz-e-rashk-e-qamar qamar meñ rahe

tamīz ġham ko diyā thā falak ne aish itnā

ki jaise jalva-e-rañg-e-sharar sharar meñ rahe

hamāre qatl ko lo nāzukī se pahle salāh

abhī to ḳhanjar-e-zeb-e-kamar kamar meñ rahe

adā-e-sharm meñ lākhoñ ishāre haiñ 'sālik'

jhukī huī ye kisī kī nazar nazar meñ rahe

rakho wo shewa na madd-e-nazar nazar mein rahe

ki jis se raaz-e-mohabbat bashar bashar mein rahe

chaman jo ban ke tera rahguzar guzar mein rahe

to naKHl-e-tur ka jalwa shajar shajar mein rahe

aziz tar hai agar ho sarishk mein tasir

latif-tar hai jo aab-e-guhar guhar mein rahe

udhar tamam kiya aasman ne apna kaam

idhar phanse hue ahl-e-hunar hunar mein rahe

wufur-e-gham se ye ji mein hai roiye is tarah

na dil mein haal na KHun-e-jigar jigar mein rahe

buri KHabar ho to is tarah nama-bar kahna

ki sidq-o-kizb ka shak be-KHabar KHabar mein rahe

samajh ke ishq kar ai dil ki kya nahin malum

jo sochte nahin naf-o-zarar zarar mein rahe

uThao qabr mein bhi lazzat-e-KHalish ta-hashr

KHuda kare ki KHadang-e-jigar jigar mein rahe

wafa hamari sitam aap ke kuchh aise hon

ki muddaton yahi charcha bashar bashar mein rahe

shab-e-firaq mili tira-rozgari mein

sahar guzar gai aur hum sahar mein rahe

hum un ki bazm mein baiThe rahe wa-lekin yun

ki jaise rahraw-e-rah-e-KHatar KHatar mein rahe

khiche jo sine se nala to chahiye ai dil

misal-e-mani-e-lafz-e-asar asar mein rahe

shab-e-visal ki yarab na raushni kam ho

wo nur-e-ariz-e-rashk-e-qamar qamar mein rahe

tamiz gham ko diya tha falak ne aish itna

ki jaise jalwa-e-rang-e-sharar sharar mein rahe

hamare qatl ko lo nazuki se pahle salah

abhi to KHanjar-e-zeb-e-kamar kamar mein rahe

ada-e-sharm mein lakhon ishaare hain 'salik'

jhuki hui ye kisi ki nazar nazar mein rahe