rakkho KHidmat mein mujhse kaam to lo

rakkho ḳhidmat meñ mujh se kaam to lo

baat karte nahīñ salām to lo

mai piyo tum surūr ho mujh ko

haath se mere ek jaam to lo

baat tum ne nahīñ kī ġhair se kal

sar pe allāh kā kalām to lo

banda hotā huuñ aap kā be-dām

hove darkār agar ġhulām to lo

nāz-o-andāz husn-o-ḳhūbī meñ

kaun hai tum sā us kā naam to lo

aap farmā.eñ jo bajā lā.ūñ

kabhī mujh se bhī koī kaam to lo

muñh se aane lagegī itr kī bū

nām-e-gesu-e-mushk-e-fām to lo

pahle kar lo rasā.ī zulf talak

silsile ko junūñ ke thaam to lo

phir taḌap lījiyo giraftāro

dam bhar ārām zer-e-dām to lo

mai piyo jo nahīñ pilāte ho

mujh ko dete nahīñ ho jaam to lo

nāz-bardār dūsrā mujh sā

kaun āshiq hai us kā naam to lo

'rind' hāzir haiñ shīsha-o-sāġhar

mai na samjho agar harām to lo

rakkho KHidmat mein mujh se kaam to lo

baat karte nahin salam to lo

mai piyo tum surur ho mujh ko

hath se mere ek jam to lo

baat tum ne nahin ki ghair se kal

sar pe allah ka kalam to lo

banda hota hun aap ka be-dam

howe darkar agar ghulam to lo

naz-o-andaz husn-o-KHubi mein

kaun hai tum sa us ka nam to lo

aap farmaen jo baja laun

kabhi mujh se bhi koi kaam to lo

munh se aane lagegi itr ki bu

nam-e-gesu-e-mushk-e-fam to lo

pahle kar lo rasai zulf talak

silsile ko junun ke tham to lo

phir taDap lijiyo giraftaro

dam bhar aaram zer-e-dam to lo

mai piyo jo nahin pilate ho

mujh ko dete nahin ho jam to lo

naz-bardar dusra mujh sa

kaun aashiq hai us ka nam to lo

'rind' hazir hain shisha-o-saghar

mai na samjho agar haram to lo