rang alfaz ka alfaz se gahra chahun

rañg alfāz kā alfāz se gahrā chāhūñ

baat karne ke liye apnā hī lahja chāhūñ

hai thakan aisī mirā paar utarnā hai muhāl

tishnagī vo hai ki bahtā huā dariyā chāhūñ

kam-nazar hai jo kare terī satā.ish mahdūd

tū vo shahkār hai maiñ jis ko sarāpā chāhūñ

tujh pe raushan mire hālāt kī zanjīreñ haiñ

rok lenā jo kabhī tujh se bichhaḌnā chāhūñ

muflisī laakh sahī daulat-e-nāyāb hai ye

maiñ tire ġham ke evaz kyuuñ ġham-e-duniyā chāhūñ

ġham hai sannāToñ meñ qadmoñ ke nishāñ tak 'rashid'

vo añdherā hai ki dīvāroñ se rastā chāhūñ

rang alfaz ka alfaz se gahra chahun

baat karne ke liye apna hi lahja chahun

hai thakan aisi mera par utarna hai muhaal

tishnagi wo hai ki bahta hua dariya chahun

kam-nazar hai jo kare teri sataish mahdud

tu wo shahkar hai main jis ko sarapa chahun

tujh pe raushan mere haalat ki zanjiren hain

rok lena jo kabhi tujh se bichhaDna chahun

muflisi lakh sahi daulat-e-nayab hai ye

main tere gham ke ewaz kyun gham-e-duniya chahun

gham hai sannaTon mein qadmon ke nishan tak 'rashid'

wo andhera hai ki diwaron se rasta chahun