rang baaten karen aur baaton se KHushbu aae

rañg bāteñ kareñ aur bātoñ se ḳhushbū aa.e

dard phūloñ kī tarah mahke agar tū aa.e

bhiig jaatī haiñ is ummīd pe āñkheñ har shaam

shāyad is raat vo mahtāb lab-e-jū aa.e

ham tirī yaad se katrā ke guzar jaate magar

raah meñ phūloñ ke lab sāyoñ ke gesū aa.e

vahī lab-tishnagī apnī vahī tarġhīb-e-sarāb

dasht-e-ma.alūm kī ham āḳhirī had chhū aa.e

maslahat-koshi-e-ahbāb se dam ghuTtā hai

kisī jānib se koī na.ara-e-yāhū aa.e

siine vīrān hue anjuman ābād rahī

kitne gul-chehra ga.e kitne parī-rū aa.e

āzmā.ish kī ghaḌī se guzar aa.e to 'ziyā'

jashn-e-ġham jaarī huā āñkhoñ meñ aañsū aa.e

rang baaten karen aur baaton se KHushbu aae

dard phulon ki tarah mahke agar tu aae

bhig jati hain is ummid pe aankhen har sham

shayad is raat wo mahtab lab-e-ju aae

hum teri yaad se katra ke guzar jate magar

rah mein phulon ke lab sayon ke gesu aae

wahi lab-tishnagi apni wahi targhib-e-sarab

dasht-e-malum ki hum aaKHiri had chhu aae

maslahat-koshi-e-ahbab se dam ghuTta hai

kisi jaanib se koi nara-e-yahu aae

sine viran hue anjuman aabaad rahi

kitne gul-chehra gae kitne pari-ru aae

aazmaish ki ghaDi se guzar aae to 'ziya'

jashn-e-gham jari hua aankhon mein aansu aae