rang-dar-rang hijabaat uThane honge

rañg-dar-rañg hijābāt uThāne hoñge

be-mahābā hameñ sab jalve dikhāne hoñge

jin ko tārīḳh kī nazreñ bhī kabhī chhū na sakeñ

batn-e-gītī meñ ka.ī aise zamāne hoñge

aaj tak shāhoñ kī tahvīl meñ jo aa na sake

saikḌoñ aise pur-asrār ḳhazāne hoñge

pusht-hā-pusht se jo dast-nigar rahte haiñ

an-ginat aise bhī mazlūm gharāne hoñge

jin meñ ġhurbat ke asīroñ ko jagah mil na sakī

vo falak-bos mahallāt girāne hoñge

jin meñ dahqānoñ kī hasrat kā jhalaktā hai lahū

ham ko vo gulshan-e-shādāb jalāne hoñge

na.e andāz se chheḌī hai ġhazal 'fāriġh' ne

ab har ik lab pe baġhāvat ke tarāne hoñge

rang-dar-rang hijabaat uThane honge

be-mahaba hamein sab jalwe dikhane honge

jin ko tariKH ki nazren bhi kabhi chhu na saken

batn-e-giti mein kai aise zamane honge

aaj tak shahon ki tahwil mein jo aa na sake

saikDon aise pur-asrar KHazane honge

pusht-ha-pusht se jo dast-nigar rahte hain

an-ginat aise bhi mazlum gharane honge

jin mein ghurbat ke asiron ko jagah mil na saki

wo falak-bos mahallat girane honge

jin mein dahqanon ki hasrat ka jhalakta hai lahu

hum ko wo gulshan-e-shadab jalane honge

nae andaz se chheDi hai ghazal 'farigh' ne

ab har ek lab pe baghawat ke tarane honge