rang lae hain gham-e-dil ke zamane kya kya

rañg laa.e haiñ ġham-e-dil ke zamāne kyā kyā

ik haqīqat ne tarāshe haiñ fasāne kyā kyā

ab to muddat se haiñ be-ḳhvāb hamārī āñkheñ

ham ne dekhe the kabhī ḳhvāb suhāne kyā kyā

kaash insān ko idrāk-e-hunar ho saktā

haiñ nihāñ paikar-e-ḳhākī meñ ḳhazāne kyā kyā

zindagī mahv-e-tamāshā hai baḌī hairat se

ai ajal haiñ tire aane ke bahāne kyā kyā

jānñā ye bhī to is ahd meñ dushvār huā

jaane kyā kyā koī shaḳhs aur na jaane kyā kyā

us kī is sāda-dilī par taras aatā hai mujhe

kah gayā mujh se chhupāne ke bahāne kyā kyā

maiñ ne kyā kyā na kiye us ko bulāne ke jatan

aur kiye us ne na aane ke bahāne kyā kyā

zaḳhm-e-dil dāġh-e-jigar nāla-e-shab āh-e-sahar

gul khilā.e haiñ mire zauq-e-vafā ne kyā kyā

qahr hai tazkira-e-ahd-e-guzishta 'at.har'

taaza ho jaate haiñ phir zaḳhm purāne kyā kyā

rang lae hain gham-e-dil ke zamane kya kya

ek haqiqat ne tarashe hain fasane kya kya

ab to muddat se hain be-KHwab hamari aankhen

hum ne dekhe the kabhi KHwab suhane kya kya

kash insan ko idrak-e-hunar ho sakta

hain nihan paikar-e-KHaki mein KHazane kya kya

zindagi mahw-e-tamasha hai baDi hairat se

ai ajal hain tere aane ke bahane kya kya

jaanna ye bhi to is ahd mein dushwar hua

jaane kya kya koi shaKHs aur na jaane kya kya

us ki is sada-dili par taras aata hai mujhe

kah gaya mujh se chhupane ke bahane kya kya

main ne kya kya na kiye us ko bulane ke jatan

aur kiye us ne na aane ke bahane kya kya

zaKHm-e-dil dagh-e-jigar nala-e-shab aah-e-sahar

gul khilae hain mere zauq-e-wafa ne kya kya

qahr hai tazkira-e-ahd-e-guzishta 'athar'

taza ho jate hain phir zaKHm purane kya kya