rang laya mera be-barg-o-nawa ho jaana

rang laayā mirā be-barg-o-navā ho jaanā

itnā āsān na thā us kā ḳhudā ho jaanā

kaun āvāz baras ban ke rahā mahmil-e-nāz

kis kī qismat meñ hai sahrā kī sadā ho jaanā

hashr tak be-gunahī naaz karegī mujh par

vo mirā terī nigāhoñ meñ burā ho jaanā

mujh pe vo vaqt paḌā hai ki shikāyat kaisī

tujh ko lāzim thā ba-har-hāl ḳhafā ho jaanā

merī taqdīr pe tohmat hī uThā.ī jaatī

tujh ko zebā na thā yuuñ ḳhud se judā ho jaanā

aaj tak yaad hai kaifiyyat-e-jāñ tere huzūr

sar se pā tak vo mirā dast-e-duā ho jaanā

'shāz' kaañp uTThe mire tark-e-mohabbat ke qadam

vo kisī pursish-e-pinhāñ kā balā ho jaanā

rang laya mera be-barg-o-nawa ho jaana

itna aasan na tha us ka KHuda ho jaana

kaun aawaz baras ban ke raha mahmil-e-naz

kis ki qismat mein hai sahra ki sada ho jaana

hashr tak be-gunahi naz karegi mujh par

wo mera teri nigahon mein bura ho jaana

mujh pe wo waqt paDa hai ki shikayat kaisi

tujh ko lazim tha ba-har-haal KHafa ho jaana

meri taqdir pe tohmat hi uThai jati

tujh ko zeba na tha yun KHud se juda ho jaana

aaj tak yaad hai kaifiyyat-e-jaan tere huzur

sar se pa tak wo mera dast-e-dua ho jaana

'shaz' kanp uTThe mere tark-e-mohabbat ke qadam

wo kisi pursish-e-pinhan ka bala ho jaana