ranj khinche the dagh khae the

rañj khīñche the daaġh khaa.e the

dil ne sadme baḌe uThā.e the

pās-e-nāmūs-e-ishq thā varna

kitne aañsū palak tak aa.e the

vahī samjhā na varna ham ne to

zaḳhm chhātī ke sab dikhā.e the

ab jahāñ āftāb meñ ham haiñ

yaañ kabhū sarv o gul ke saa.e the

kuchh na samjhe ki tujh se yāroñ ne

kis tavaqqo.a pe dil lagā.e the

fursat-e-zindagī se mat pūchho

saañs bhī ham na lene paa.e the

'mīr' sāhab rulā ga.e sab ko

kal ve tashrīf yaañ bhī laa.e the

ranj khinche the dagh khae the

dil ne sadme baDe uThae the

pas-e-namus-e-ishq tha warna

kitne aansu palak tak aae the

wahi samjha na warna hum ne to

zaKHm chhati ke sab dikhae the

ab jahan aaftab mein hum hain

yan kabhu sarw o gul ke sae the

kuchh na samjhe ki tujh se yaron ne

kis tawaqqoa pe dil lagae the

fursat-e-zindagi se mat puchho

sans bhi hum na lene pae the

'mir' sahab rula gae sab ko

kal we tashrif yan bhi lae the