ranj-o-gham ki jab mere dil mein farawani na thi

ranj-o-ġham kī jab mire dil meñ farāvānī na thī

jī rahā thā maiñ magar jiine meñ āsānī na thī

mujh ko le pahuñchā junūn-e-shauq aisī bazm meñ

jis jagah koī bhī sūrat jānī-pahchānī na thī

kis ko fursat thī uThātā chāñd kī jānib nazar

kyā hamāre dil ke dāġhoñ meñ daraḳhshānī na thī

ek aisā vaqt bhī guzrā hai mujh par kyā kahūñ

jab mirī āvāz apnoñ ne bhī pahchānī na thī

ye haqīqat thī ki thā mere tasavvur kā kamāl

duur tere sang-e-dar se merī peshānī na thī

aisā lagtā hai ki koī inqalāb aane ko hai

varna pahle to nazar kuchh itnī dīvānī na thī

ranj-o-gham ki jab mere dil mein farawani na thi

ji raha tha main magar jine mein aasani na thi

mujh ko le pahuncha junun-e-shauq aisi bazm mein

jis jagah koi bhi surat jaani-pahchani na thi

kis ko fursat thi uThata chand ki jaanib nazar

kya hamare dil ke daghon mein daraKHshani na thi

ek aisa waqt bhi guzra hai mujh par kya kahun

jab meri aawaz apnon ne bhi pahchani na thi

ye haqiqat thi ki tha mere tasawwur ka kamal

dur tere sang-e-dar se meri peshani na thi

aisa lagta hai ki koi inqalab aane ko hai

warna pahle to nazar kuchh itni diwani na thi