ranj par ranj musibat si musibat dekhi

rañj par rañj musībat sī musībat dekhī

hijr-e-maulā meñ ye ārām kī sūrat dekhī

mahv-e-dīdār rahe hashr meñ āshiq tere

aañkh uThā kar na kabhī ḳhuld kī sūrat dekhī

le liyā vāda-e-baḳhshish bhī duhā.ī kar ke

shāfe-e-hashr kī ummat se mohabbat dekhī

aa ga.ī mujh ko nazar ġhāyat-e-chashm-e-mushtāq

qabr meñ aa ke mohammad kī jo sūrat dekhī

āzmātī hai shab-e-hijr mujhe kyā hamdam

maiñ to ḳhush huuñ ki judā.ī kī haqīqat dekhī

jalve kā va.ada qayāmat pe kiyā thā mauqūf

aap ke hijr meñ sau baar qayāmat dekhī

ḳhush-nasībī hai ki maiñ ashraf-e-maḳhlūq huā

lillāhil-hamd ġham-e-ishq kī lazzat dekhī

ḳhār-e-taiba ko gul-e-ḳhuld se baḌh kar samjhe

ham ne in kāñToñ meñ vo bū-e-mohabbat dekhī

daur-e-sāġhar se to pahle hī na thā hosh mujhe

maiñ ne saaqī kī nigāhoñ meñ karāmat dekhī

parda-e-hashr meñ poshīda rakhā apnā jamāl

us ne jab tālib-e-dīdār kī kasrat dekhī

duḳhtar-e-raz kī nigāhoñ se bachā.e allāh

aap ne 'rāsiḳh'-e-mai-ḳhvār kī hālat dekhī

ranj par ranj musibat si musibat dekhi

hijr-e-maula mein ye aaram ki surat dekhi

mahw-e-didar rahe hashr mein aashiq tere

aankh uTha kar na kabhi KHuld ki surat dekhi

le liya wada-e-baKHshish bhi duhai kar ke

shafe-e-hashr ki ummat se mohabbat dekhi

aa gai mujh ko nazar ghayat-e-chashm-e-mushtaq

qabr mein aa ke mohammad ki jo surat dekhi

aazmati hai shab-e-hijr mujhe kya hamdam

main to KHush hun ki judai ki haqiqat dekhi

jalwe ka wada qayamat pe kiya tha mauquf

aap ke hijr mein sau bar qayamat dekhi

KHush-nasibi hai ki main ashraf-e-maKHluq hua

lillahil-hamd gham-e-ishq ki lazzat dekhi

KHar-e-taiba ko gul-e-KHuld se baDh kar samjhe

hum ne in kanTon mein wo bu-e-mohabbat dekhi

daur-e-saghar se to pahle hi na tha hosh mujhe

main ne saqi ki nigahon mein karamat dekhi

parda-e-hashr mein poshida rakha apna jamal

us ne jab talib-e-didar ki kasrat dekhi

duKHtar-e-raz ki nigahon se bachae allah

aap ne 'rasiKH'-e-mai-KHwar ki haalat dekhi