dagh duniya ne diye zaKHm zamane se mile

daaġh duniyā ne diye zaḳhm zamāne se mile

ham ko tohfe ye tumheñ dost banāne se mile

ham taraste hī taraste hī taraste hī rahe

vo falāne se falāne se falāne se mile

ḳhud se mil jaate to chāhat kā bharam rah jaatā

kyā mile aap jo logoñ ke milāne se mile

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

kabhī likhvāne ga.e ḳhat kabhī paḌhvāne ga.e

ham hasīnoñ se isī hiile bahāne se mile

ik nayā zaḳhm milā ek na.ī umr milī

jab kisī shahr meñ kuchh yaar purāne se mile

ek ham hī nahīñ phirte haiñ liye qissa-e-ġham

un ke ḳhāmosh laboñ par bhī fasāne se mile

kaise māneñ ki unheñ bhuul gayā tū ai 'kaif'

un ke ḳhat aaj hameñ tere sirhāne se mile

dagh duniya ne diye zaKHm zamane se mile

hum ko tohfe ye tumhein dost banane se mile

hum taraste hi taraste hi taraste hi rahe

wo falane se falane se falane se mile

KHud se mil jate to chahat ka bharam rah jata

kya mile aap jo logon ke milane se mile

man ki aaghosh mein kal maut ki aaghosh mein aaj

hum ko duniya mein ye do waqt suhane se mile

kabhi likhwane gae KHat kabhi paDhwane gae

hum hasinon se isi hile bahane se mile

ek naya zaKHm mila ek nai umr mili

jab kisi shahr mein kuchh yar purane se mile

ek hum hi nahin phirte hain liye qissa-e-gham

un ke KHamosh labon par bhi fasane se mile

kaise manen ki unhen bhul gaya tu ai 'kaif'

un ke KHat aaj hamein tere sirhane se mile