raqs kiya kabhi shor machaya pahli pahli barish mein

raqs kiyā kabhī shor machāyā pahlī pahlī bārish meñ

maiñ thā merā pāgal-pan thā pahlī pahlī bārish meñ

paiham dastak par būñdoñ kī āḳhir us ne dhyān diyā

khul gayā dhīre dhīre darīcha pahlī pahlī bārish meñ

ek akelā maiñ hī ghar meñ ḳhauf-zada sā baiThā thā

varna shahr to bhiig rahā thā pahlī pahlī bārish meñ

aane vaale sabz dinoñ kī sab shādābī, us se hai

āñkhoñ ne jo manzar dekhā pahlī pahlī bārish meñ

shaam paḌe so jaane vālā! diip bujhā kar yādoñ ke

raat ga.e tak jaag rahā thā pahlī pahlī bārish meñ

jaane kyā kyā ḳhvāb bune the, pahle sāvan meñ, maiñ ne

jaane is par kyā kyā likkhā pahlī pahlī bārish meñ

raqs kiya kabhi shor machaya pahli pahli barish mein

main tha mera pagal-pan tha pahli pahli barish mein

paiham dastak par bundon ki aaKHir us ne dhyan diya

khul gaya dhire dhire daricha pahli pahli barish mein

ek akela main hi ghar mein KHauf-zada sa baiTha tha

warna shahr to bhig raha tha pahli pahli barish mein

aane wale sabz dinon ki sab shadabi, us se hai

aankhon ne jo manzar dekha pahli pahli barish mein

sham paDe so jaane wala! dip bujha kar yaadon ke

raat gae tak jag raha tha pahli pahli barish mein

jaane kya kya KHwab bune the, pahle sawan mein, main ne

jaane is par kya kya likkha pahli pahli barish mein