raqsan sharar-e-dil teri mauj-e-suKHan se tha

raqsāñ sharār-e-dil tirī mauj-e-suḳhan se thā

tanhā.ī meñ ye qurb tirī anjuman se thā

merā suḳhan hī thā mirā sarmāya-e-hayāt

phir maiñ huā shahīd bhī apne suḳhan se thā

dānishvarī kā zahr na thā mujh pe kārgar

mere libās-e-ḳhās ḳhirad ke kafan se thā

luTne se bhī sivā thā shikast-e-yaqīñ kā ġham

shab-ḳhūñ kā ehtimāl to thā rāhzan se thā

the yār-e-tez-gām bhī jāda-shanās bhī

ruḳh un kā jo bhī thā vo havā ke chalan se thā

un se bichhaḌ ke huuñ koī āvāra ruuh maiñ

goyā mirā vajūd unhīñ ke badan se thā

gulchīn-o-bāġhbāñ hī nahīñ vāris-e-chaman

murġhān-e-naġhma-ḳhvāñ kā bhī rishta chaman se thā

raqsan sharar-e-dil teri mauj-e-suKHan se tha

tanhai mein ye qurb teri anjuman se tha

mera suKHan hi tha mera sarmaya-e-hayat

phir main hua shahid bhi apne suKHan se tha

danishwari ka zahr na tha mujh pe kargar

mere libas-e-KHas KHirad ke kafan se tha

luTne se bhi siwa tha shikast-e-yaqin ka gham

shab-KHun ka ehtimal to tha rahzan se tha

the yar-e-tez-gam bhi jada-shanas bhi

ruKH un ka jo bhi tha wo hawa ke chalan se tha

un se bichhaD ke hun koi aawara ruh main

goya mera wajud unhin ke badan se tha

gulchin-o-baghban hi nahin waris-e-chaman

murghan-e-naghma-KHwan ka bhi rishta chaman se tha