rasm-e-girya bhi uTha di humne

rasm-e-girya bhī uThā dī ham ne

āḳhirī sham' bujhā dī ham ne

ek mauhūm tasavvur ke liye

ruuh kī aab gañvā dī ham ne

darmiyān-e-dil o gulzār-e-hayāt

ġham kī dīvār uThā dī ham ne

raakh bhī paa.e na koī apnī

ab ke vo aag lagā dī ham ne

sansanāte rahe taare pahroñ

kyuuñ tirī baat sunā dī ham ne

har kaḌī raah meñ har manzil par

tere hī ġham ko sadā dī ham ne

aas ke bujhte hue sho.ale ko

tere dāman se havā dī ham ne

jab tujhe bhūlnā chāhā dil ne

ik na.e ġham kī sazā dī ham ne

koī ġhuncha kisī goshe meñ khilā

baaġh meñ dhuum machā dī ham ne

kaisī ābād thī duniyā 'shohrat'

kaisī sunsān banā dī ham ne

rasm-e-girya bhi uTha di hum ne

aaKHiri sham' bujha di hum ne

ek mauhum tasawwur ke liye

ruh ki aab ganwa di hum ne

darmiyan-e-dil o gulzar-e-hayat

gham ki diwar uTha di hum ne

rakh bhi pae na koi apni

ab ke wo aag laga di hum ne

sansanate rahe tare pahron

kyun teri baat suna di hum ne

har kaDi rah mein har manzil par

tere hi gham ko sada di hum ne

aas ke bujhte hue shoale ko

tere daman se hawa di hum ne

jab tujhe bhulna chaha dil ne

ek nae gham ki saza di hum ne

koi ghuncha kisi goshe mein khila

bagh mein dhum macha di hum ne

kaisi aabaad thi duniya 'shohrat'

kaisi sunsan bana di hum ne