rasm-o-rah-e-awam kya jaane

rasm-o-rāh-e-avām kyā jaane

'āshiqī nang-o-nām kyā jaane

dar-guzar meñ jo lutf pinhāñ hai

ḳhūgar-e-intiqām kyā jaane

na ho jis dil meñ soz-e-sham-e-amal

juz-suḳhan juz-kalām kyā jaane

mauj-e-dariyā kī ho ravish jis meñ

vo sukūn-o-qayām kyā jaane

talḳhiyāñ ranj-e-be-navā.ī kī

ḳhātir-e-shād-kām kyā jaane

pūchhiye mai-kashoñ se lutf-e-sharāb

shīsha kyā jaane jaam kyā jaane

husn-e-fitrat kā jāvedāñ honā

basta-e-sub.h-o-shām kyā jaane

bandagī meñ ho be-ḳhudī jis kī

vo ḳhudī kā maqām kyā jaane

sa.ī-e-takmīl-o-azm-e-pā.inda

jazba-e-nā-tamām kyā jaane

jise irfān-e-hijr hāsil ho

vo payām-o-salām kyā jaane

kyā haiñ āzād zindagī ke maze

koī mānūs-e-dām kyā jaane

raah ke sang-o-ḳhisht kī iizā

rahrav-e-tez-gām kyā jaane

dam-e-raftār kaifiyat dil kī

koī mahshar-ḳhirām kyā jaane

martaba kufr-e-ishq kā 'tālib'

shaiḳh-ए-bait-ul-harām kyā jaane

rasm-o-rah-e-awam kya jaane

'ashiqi nang-o-nam kya jaane

dar-guzar mein jo lutf pinhan hai

KHugar-e-intiqam kya jaane

na ho jis dil mein soz-e-sham-e-amal

juz-suKHan juz-kalam kya jaane

mauj-e-dariya ki ho rawish jis mein

wo sukun-o-qayam kya jaane

talKHiyan ranj-e-be-nawai ki

KHatir-e-shad-kaam kya jaane

puchhiye mai-kashon se lutf-e-sharab

shisha kya jaane jam kya jaane

husn-e-fitrat ka jawedan hona

basta-e-subh-o-sham kya jaane

bandagi mein ho be-KHudi jis ki

wo KHudi ka maqam kya jaane

sai-e-takmil-o-azm-e-painda

jazba-e-na-tamam kya jaane

jise irfan-e-hijr hasil ho

wo payam-o-salam kya jaane

kya hain aazad zindagi ke maze

koi manus-e-dam kya jaane

rah ke sang-o-KHisht ki iza

rahraw-e-tez-gam kya jaane

dam-e-raftar kaifiyat dil ki

koi mahshar-KHiram kya jaane

martaba kufr-e-ishq ka 'talib'

shaiKH-ए-bait-ul-haram kya jaane