rasm-o-rah-e-dahr kya josh-e-mohabbat bhi to ho

rasm-o-rāh-e-dahr kyā josh-e-mohabbat bhī to ho

TuuT jaatī hai har ik zanjīr vahshat bhī to ho

zindagī kyā maut kyā do karvaTeñ haiñ 'ishq kī

sone vaale chauñk uTTheñge qayāmat bhī to ho

''harche bādā-bād'' ke na.aroñ se duniyā kaañp uThī

'ishq ke itnā koī bargashta qismat bhī to ho

kār-zār-e-dahr meñ har kaif har mastī bajā

kuchh sharīk-e-be-ḳhudī rindāna-e-jur.at bhī to ho

kam nahīñ ahl-e-havas kī bhī ḳhayāl-ārā.iyāñ

ye fanā kī had se bhī baḌh jaa.eñ himmat bhī to ho

kuchh ishārāt-e-nihāñ hoñ to nigāh-e-nāz ke

bhāñp leñge ham ye mahfil rashk-e-ḳhalvat bhī to ho

ab to kuchh ahl-e-razā bhī ho chale māyūs se

har jafā-e-nā-ravā kī kuchh nihāyat bhī to ho

har nafas se aa.e bū-e-ātish-e-sayyāl-e-ishq

aag vo dil meñ lahū meñ vo harārat bhī to ho

ye tire jalve ye chashm-e-shauq kī hairāniyāñ

barq-e-husn-e-yār nazzāre kī fursat bhī to ho

gardish-e-daurāñ meñ ik din aa rahegā hosh bhī

ḳhatm ai chashm-e-siyah ye daur-e-ġhaflat bhī to ho

har dil-e-afsurda se chingāriyāñ uḌ jā.eñgī

kuchh tirī mā'sūm āñkhoñ meñ sharārat bhī to ho

ab vo itnā bhī nahīñ begāna-e-vaj.h-e-malāl

pursish-e-ġham us ko aatī hai zarūrat bhī to ho

ek sī haiñ ab to husn-o-'ishq kī majbūriyāñ

ham hoñ yā tum ho vo ahd-e-bā-farāġhat bhī to ho

dekh kar rañg-e-mizāj-e-yār kyā kahiye 'firāq'

is meñ kuchh gunjā.ish-e-shukr-o-shikāyat bhī to ho

rasm-o-rah-e-dahr kya josh-e-mohabbat bhi to ho

TuT jati hai har ek zanjir wahshat bhi to ho

zindagi kya maut kya do karwaTen hain 'ishq ki

sone wale chaunk uTThenge qayamat bhi to ho

harche baada-baad ke naron se duniya kanp uThi

'ishq ke itna koi bargashta qismat bhi to ho

kar-zar-e-dahr mein har kaif har masti baja

kuchh sharik-e-be-KHudi rindana-e-jurat bhi to ho

kam nahin ahl-e-hawas ki bhi KHayal-araiyan

ye fana ki had se bhi baDh jaen himmat bhi to ho

kuchh ishaaraat-e-nihan hon to nigah-e-naz ke

bhanp lenge hum ye mahfil rashk-e-KHalwat bhi to ho

ab to kuchh ahl-e-raza bhi ho chale mayus se

har jafa-e-na-rawa ki kuchh nihayat bhi to ho

har nafas se aae bu-e-atish-e-sayyal-e-ishq

aag wo dil mein lahu mein wo hararat bhi to ho

ye tere jalwe ye chashm-e-shauq ki hairaniyan

barq-e-husn-e-yar nazzare ki fursat bhi to ho

gardish-e-dauran mein ek din aa rahega hosh bhi

KHatm ai chashm-e-siyah ye daur-e-ghaflat bhi to ho

har dil-e-afsurda se chingariyan uD jaengi

kuchh teri ma'sum aankhon mein shararat bhi to ho

ab wo itna bhi nahin begana-e-wajh-e-malal

pursish-e-gham us ko aati hai zarurat bhi to ho

ek si hain ab to husn-o-'ishq ki majburiyan

hum hon ya tum ho wo ahd-e-ba-faraghat bhi to ho

dekh kar rang-e-mizaj-e-yar kya kahiye 'firaq'

is mein kuchh gunjaish-e-shukr-o-shikayat bhi to ho