raunaq-e-kucha-o-bazar hain teri aankhen

raunaq-e-kūcha-o-bāzār haiñ terī āñkheñ

log saudā haiñ ḳharīdār haiñ terī āñkheñ

kyā yūñhī jāzib-o-dildār haiñ terī āñkheñ

ḳhāliq-e-husn kā shahkār haiñ terī āñkheñ

ye na hotīñ to kisī dil meñ na tūfāñ uThtā

shauq-añgez o fusūñ-kār haiñ terī āñkheñ

terī ma.asūmiyat-e-dil kā pata detī haiñ

terī mahbūbī kā iqrār haiñ terī āñkheñ

jām-o-mīnā kī tarah ḳhud hī chhalak jaatī haiñ

kitnī maḳhmūr haiñ sarshār haiñ terī āñkheñ

un kī taqdīs pe ho azmat-e-maryam bhī nisār

kaun kahtā hai gunahgār haiñ terī āñkheñ

palkeñ bojhal haiñ madhur niiñd ke maare lekin

jaane kyā baat hai bedār haiñ terī āñkheñ

jaise sāvan kī ghaTā TuuT ke barse ai dost

aaj kuchh aise guhar-bār haiñ terī āñkheñ

mere mahbūb-e-dil-āvez batā de itnā

mujh se kis shai kī talabgār haiñ terī āñkheñ

hasrateñ dil meñ liye Duub rahā hai 'daurāñ'

mauj-dar-mauj haiñ mañjdhār haiñ terī āñkheñ

raunaq-e-kucha-o-bazar hain teri aankhen

log sauda hain KHaridar hain teri aankhen

kya yunhi jazib-o-dildar hain teri aankhen

KHaliq-e-husn ka shahkar hain teri aankhen

ye na hotin to kisi dil mein na tufan uThta

shauq-angez o fusun-kar hain teri aankhen

teri masumiyat-e-dil ka pata deti hain

teri mahbubi ka iqrar hain teri aankhen

jam-o-mina ki tarah KHud hi chhalak jati hain

kitni maKHmur hain sarshaar hain teri aankhen

un ki taqdis pe ho azmat-e-maryam bhi nisar

kaun kahta hai gunahgar hain teri aankhen

palken bojhal hain madhur nind ke mare lekin

jaane kya baat hai bedar hain teri aankhen

jaise sawan ki ghaTa TuT ke barse ai dost

aaj kuchh aise guhar-bar hain teri aankhen

mere mahbub-e-dil-awez bata de itna

mujh se kis shai ki talabgar hain teri aankhen

hasraten dil mein liye Dub raha hai 'dauran'

mauj-dar-mauj hain manjdhaar hain teri aankhen