raushan hazar chand hain shams-o-qamar se aap

raushan hazār chand haiñ shams-o-qamar se aap

ġhā.eb haiñ par nigāh kī sūrat nazar se aap

āñkheñ bichhāte phirte haiñ mushtāq raah meñ

kyā jāniye guzarte haiñ kis rahguzar se aap

ro.e koī ġharīb to hañsnā na chāhiye

vāqif nahīñ kisī ke fuġhān-e-asar se aap

kāñTe bhare haiñ ḳhat meñ jo chhūte nahīñ ise

itnā na haath khīñchiye merī ḳhabar se aap

rahgīr kyuuñ taḌapte haiñ tashvīsh thī mujhe

ab khul gayā ki jhāñkte haiñ chāk-e-dar se aap

hammām ne to aur bhī chamkā diyā badan

goyā nahā ke nikle haiñ āb-e-guhar se aap

lā.eñge raah par ye ruḳh-o-zulf ek din

dekheñge shaam tak mirā rasta sahar se aap

āñkhoñ kī tarah rone lageñ rauzan-e-makāñ

pūchheñ hamārā haal jo dīvār-o-dar se aap

mirrīḳh-pan mizāj meñ a.azā meñ nāzukī

teġh-e-shuā bāñdhiye apnī kamar se aap

ai zāhidān-e-ḳhushk ye ġhairat kā hai maqām

āgāh aaj tak nahīñ ḳhāliq ke ghar se aap

zāhir hai murġh-e-qibla-numā bhī gavāh hai

ka.abe kī samt pūchhte haiñ jānvar se aap

kyūñkar malak kahūñ ki malak ḳhādim aap ke

haiñ vo bashar ki maltī haiñ ḳhairul-bashar se aap

jo baat aap kī hai mashiyyat ḳhudā kī hai

be-shubah muḳhtalat haiñ qazā-o-qadar se aap

phislā hai mere āñsuoñ meñ paañv aap kā

bande kā sar utāriye aaj apne sar se aap

ai 'bahr' rahm khā.egā vo rone par zarūr

dho rakhiye apne muñh ko zarā chashm-e-tar se aap

raushan hazar chand hain shams-o-qamar se aap

ghaeb hain par nigah ki surat nazar se aap

aankhen bichhate phirte hain mushtaq rah mein

kya jaaniye guzarte hain kis rahguzar se aap

roe koi gharib to hansna na chahiye

waqif nahin kisi ke fughan-e-asar se aap

kanTe bhare hain KHat mein jo chhute nahin ise

itna na hath khinchiye meri KHabar se aap

rahgir kyun taDapte hain tashwish thi mujhe

ab khul gaya ki jhankte hain chaak-e-dar se aap

hammam ne to aur bhi chamka diya badan

goya naha ke nikle hain aab-e-guhar se aap

laenge rah par ye ruKH-o-zulf ek din

dekhenge sham tak mera rasta sahar se aap

aankhon ki tarah rone lagen rauzan-e-makan

puchhen hamara haal jo diwar-o-dar se aap

mirriKH-pan mizaj mein aaza mein nazuki

tegh-e-shua bandhiye apni kamar se aap

ai zahidan-e-KHushk ye ghairat ka hai maqam

aagah aaj tak nahin KHaliq ke ghar se aap

zahir hai murgh-e-qibla-numa bhi gawah hai

kabe ki samt puchhte hain jaanwar se aap

kyunkar malak kahun ki malak KHadim aap ke

hain wo bashar ki malti hain KHairul-bashar se aap

jo baat aap ki hai mashiyyat KHuda ki hai

be-shubah muKHtalat hain qaza-o-qadar se aap

phisla hai mere aansuon mein panw aap ka

bande ka sar utariye aaj apne sar se aap

ai 'bahr' rahm khaega wo rone par zarur

dho rakhiye apne munh ko zara chashm-e-tar se aap